Sport.cw

Sponsored by

Sponsored by

Sponsored by

Promé triunfo pa Fire Birds

Fire Birds a gana ayera djamars, 14 di yüni 2022, ku skor di 10 pa 6 di Marchena Braves. Esaki ta e promé viktoria dje tim den e kampionato nobo di beisbòl dòbel A. E timnan ta bolbe hunga kontra di otro awenochi.

Federashon Beisbòl Kòrsou, esta Febeko, dos siman pasá a ranka sali ku e kompetensia nobo den divishon superior. E kampionato ta tuma lugá den Stadion Johnny Vrutaal i Tio Daou Ballpark.

Fire Birds i Marchena Braves a topa otro ayeranochi den Tio Daou Ballpark. E tim di Marchena Braves a hinka 1 kareda den kabes di promé inen pa pika dilanti. Fire Birds den bòm dje di dos inen a empatá e wega na 1 kareda.

Ku 3 kareda den di tres i 1 kareda mas den di sinku inen Marchena Braves ta tuma ventaha di 5 pa 1. Fire Birds den bòm di sinku inen a skor 4 kareda pa bolbe empatá e wega: 5-5. E tim aki a skor 2 kareda den tantu di seis komo shete inen i 1 den di ocho pa un ventaha komodo di 10 pa 5.

Marchena Braves a purba un ultimo atake den di nuebe inen, pero a skor solamente 1 kareda. Esaki a nifiká ku Fire Birds a gana su wega ku 10 pa 6.

Picher Mitchelson Felipa a gana e wega pa Fire Birds. Den di sinku inen ela drenta di relevo na lugá di picher habridó Cedeon Langguth. Den kuater inen Felipa a pèrmití 2 kareda riba 2 hit i a poncho 4 batiadó di Marchena Braves.

Rian-Angel Windster a tèrminá komo mihó batiadó dje wega i di Fire Birds. Ela dal 3 hit den 4 turno na bate. Ela skor 1 kareda i a empuhá 3 kareda.

E seri entre Fire Birds i Marchena Braves ta sigui awenochi ku e di dos wega di nan seri. Nan ta topa otro den Stadion Johnny Vrutaal na Rif, Otrobanda.

Translate »