WILLEMSTAD – E fin di siman i wikènt tras di lomba tabatin vários wega di beisbòl di RBI Senior Division. Den e divishon aki Sta Rosa Indians a gana su dos enkuentronan. Pa motibu di awaseru a kanselá partidonan di divishon Junior.
RBI Curaçao 2018 ta kai bou di ouspisio di Curaçao Baseball Development Foundation (CBDF) i kampionato ta bou di maneho di Fundashon pa Nan. E spònser prinsipal ta MCB. Hensley Meulens a hasi donashon di balanan, miéntras ku KNBSB tambe ta yuda RBI.
E weganan di RBI divishon Senior a tuma lugá den Tio Daou Ballpark. RBI Curaçao 2018 ta reprogramá tur e weganan kanselá riba otro fechanan.
Riba djasabra Van Engelen Giants a gana di Bandabou Cubs ku skor di 13-3. Picher ganadó tabata Justin Melaan, miéntras ku 4 bateadó a bai di 3-2 pa Giants: Chirino, Paulina, Sophia i Melaan. Picher pèrdèdó tabata Ro-anne Luciana miéntras ku Reiner Luis Aries a konektá e úniko hit pa Cubs.
Sta. Rosa Indians a pasa riba Brievengat Orioles 23-5. Picher Yevgenni Reinita a gana e wega’ki i tres bateadó di Indians a bai di 3-3, Janzen, Klaber i Jops. Picher pèrdèdó tabata Eudelmar Kalmez, miéntras ku Dylan Harms a bai di 2-2 ku un honron.
Sta. Maria Pirates a gana di Marchena Reds ku skor di 8-1. Picher ganadó tabata Raichel Servinus i Yardon Lionarons a bai di 2-2. Picher pèrdèdó tabata Rayendley Djaoen i mihó bate pa Reds tabata Harlyson Daantje di 2-2.
E promé wega di djadumingu a keda empatá na 6-6 entre Bandabou Cubs i Brievengat Orioles. Mihó bate pa Orioles tabata Kyron Chirino di 1-1 i pa Cubs tabatin 3 bateadó di 2-1: Luciana, Streden i Tokaay.
Despues Marchena Reds a gana di Tra’i Seru Dodgers ku skor di 5-2. Gedion Baromeo tabata e picher ku a gana i mihó bateadó pa Reds tabata Rayendly Djaoen di 1-1. Picher pèrdèdó tabata Christopher Balentia i mihó bateadó pa Dodgers tabata Lutson Pieters di 3-3 ku 1 honron.
St. Michiel Athletics a gana di Van Engelen Giants ku skor di 8-4. Picher ganadó tabata Jediah Kwidama miéntras ku Eljan Martina a bai di 3-2 i Danyoni Newton tabatin 1 honron. Picher Lousandry Henriette a pèrdè e wega, miéntras ku 4 bateadó a bai di 2-1: Henriette, Nahr, Zalm i James.
Por último, Sta Rosa Indians a blankea Montaña Ariba Diamondbacks 18-0. Picher Edmont Jops a gana e enkuentro i mihó bate pa Indians tabata Inecia i Antonia, tur dos di 2-2. Picher pèrdèdó tabata Sudjurley Michel i mihó bate pa Diamonbacks tabata Rowgino Josepha di 1-1.