E kampionato di tènis di mesa, esta pin pòn, pa ekipo ta drenta den su fase di pre final den tantu Masters komo klas A. Awe nochi -djamars 24 di oktober 2017- ta ranka sali ku weganan di semi final den klase A, miéntras ku djaweps ta hunga semi final den Masters.
Ultimo 2 lunanan Federashon di Tènis di Mesa Kòrsou (FTMK) a organisá e bueltanan preliminar den kompetensia di tim. Esakinan a tuma lugá den Sala Irene Moreno na Muizenberg.
E timnan den klas A ku a klasifiká pa semi final ta: Social Media & More (M.Dalnoot/D.Meilink/H. Metry), Freshmen (D. Leon/G. da Costa), Donic (J. Mathilda/S. Carmelia/R. Martir) i KPMG (R. Begina/R. Vos).
E timnan den Master ku a klasifiká pa semi final ta: Barberia Cinto (J. Zimmerman/L. Alberg/H. Wentwoord), Watch Out (R. Cathalina/R. Hernandez/I. Moeniralam/A. Wijsheijer), MF Medical (D. Hendriks/C. Walters/A. Solomon/J. Rodriguez) i Robbies Lottery (E. Sophia/E. Vlieg/E. Adamus).
Awe nochi djamars ta hunga semi final den klas. E tim Social Media & More ta hunga kontra KPMG, miéntras ku Freshmen ta enfrentá Donic. E timnan ganadó ta pasa pa final ku lo tuma lugá riba djamars 31 di oktober.
Djaweps awor, 26 di oktober, ta hunga semi final den Masters. E ekipo di Barberia Cinto ta hunga kontra Robbies Lottery, miéntras ku Watch Out tin komo kontrinkante MF Medical. E timnan ganadó ta pasa pa final ku lo keda efektuá riba djaweps 2 di novèmber.
