E seri di weganan den prefinal di sòfbòl femenino dòbel A ta sigui djamars 31 di oktober akí. Fenix i Sta Rosa Angels ta topa otro den Sabana Ballpark. Esaki ta e promé wega dje seri akí ku ta hunga mihó di 3.
E kampionato regular a kaba ku Pinchingolo na promé puesto ku 14 wega ganá i solamente 2 derota. Na di dos lugá e keda Fenix ku a gana 11 wega i pèrdè 5. Sta Rosa i Souax a kaba ku 6 viktoria i 10 derota empatá na di tres puesto.
De e seri prefinal number 1 i 2 ta topa otro i e ganadó ta klasifiká dirèkt pa final, miéntras e tim pèrdèdó ta bai hunga kontra e ganadó dje seri entre number 3 i 4. E tim ku gana esaki ta subi pa final.
Asina ta ku Pichingolo Nissan den e seri di 1 vs 2 a derotá Fenix. Esaki a nifiká ku e tim kampion a klasifiká dirèkt pa final. Den e otro seri Sta Rosa Angels a eleminá Souax Gill Sport i ta bai hunga kontra Fenix.
Pichingolo ku pa di 48 biaha a klasifiká pa final, tin ku sinta un ratu warda e ganadó dje di dos seri. E promé wega dje serie entre Sta Rosa i Fenix ta kuminsá 8or den Sabana Ballpark. E di dos wega ta planiá pa tuma lugá djaweps 2 di novèmber den Sam Bunting Ballpark.