Shuatanari ta e kampion femenino nobo di Kòrsou den divishon superior di vòlibòl. E tim a gana awe, djadumingu 3 di mart, tambe e di tres wega dje final ku skor di 3-0 di Stakamahakchi. Porsierto ku Shuatanari e aña aki no a pèrdè niun wega i den final asta a swip ganando tur nuebe sèt ku ela hunga.
Stakamahakchi tabatin ku gana awenochi pa asina forsá un di kuater wega den final di divishon superior femenino di Federashon Vòlibòl Kòrsou (FeVoKo). E tim ku ultimo ocho aña tabata kampion di Kòrsou, atrobe no a logra hasi daño na Shuatanari ku tabata simplemente mihó den tur aspekto.
Shuatanari manera kustumber a sali pika dilanti ganando e promé sèt ku skor di 25-15. E tim a kuminsá e di dos riba mesun pia i a gana esaki ku parsial di 25-17. Parse ku esei a kibra for di trempan e spiritu luchadó di Stakamahakchi ku a pèrdè tambe e di tres sèt 25-9.
E organisashon di Shuatanari e aña aki pues a bari ku tur premio den vòlibòl. E tim ku a hunga den divishon A tambe a bira kampioen indiskutí, derotando Watakeli den final. Den divishon superior Shuatanari a kaba e bueltanan preliminar invikto i den final tambe a gana tur su wega sin pèrdè ni un sèt.
E direktiva nobo di FeVoKo por mira tras riba un tremendo kampionato femenino. E tin ku traha sinembargo ainda riba su relashon públiko pa asina via di su pagina di Facebook i prensa tene fanatikonan mas mihó informá di desaroyo dje kompetensianan den tantu divishon A komo superior.
