Shuatanari parse e aña aki tin plan hopi serio. E tim awor ta un triunfo for di konkistá e titulo kampionil den divishon superior femenino di vòlibòl. E aktual kampion Stakamahakchi awenochi a bolbe sufri otro derota den tres sèt den final.
E final den divishon superior femenino di Federashon Vòlibòl Kòrsou (FeVoKo) a sigui awenochi ku e di dos wega entre Shuatanari i Stakamahakchi. E serie ta tumando lugá den sala Errol Rooi di Sentro Deportivo Kòrsou (SDK) den Brievengat.
E organisashon di Shuatanari e aña aki parse ta bai bari ku tur premio den vòlibòl. E tim den divishon A djaluna tras di lomba a bira kampioen derotando Watakeli. Den divishon superior Shuatanari a kaba e bueltanan preliminar invikto i den playoffs ainda tampoko no a pèrdè niun wega.
Despues ku djadumingu Shuatanari a gana e promé wega di final ku skor di 3-0, e tim awenochi a ripití e prestashon aki derotando Stakamahakchi pa pika 2-0 dilanti. E parsialnan tabata 25-21, 25-10 i 25-20. Ku otro palabra Shuatanari den e final a hunga seis sèt i gana tur i awor falta un triunfo pa bira kampion.
Sí Shuatanari gana djadumingu e di tres wega di final tambe, e tim por mira’tras riba un aña históriko. Esaki ta nifiká ku e ta kibra e dominio di Stakamahakchi ku ocho aña konsekutivo ta kampion lokal. E aña’ki simplemente e muchanan di Staka no tabata por te ainda pa desifrá e wega di Shuatanari.
