E kampionato di sòfbòl hubenil a ranka sali awe, djabièrnè 16 di febrüari 2018, ku Souax Gil’Sport 1 ganando ku skor di 9-2 di Sta Rosa Angels Vanddis 1. E kompetensia e aña aki tambe ta patrosiná pa Maduro & Curiel’s Bank, esta MCB.
Curaçaose Softball Bond (CSB) ta organisá e kampionato ku ta konta ku partisipashon di 5 tim: Sta. Rosa Angels Vanddis 1 i 2, Souax Gil’Sport 1 i 2 i Pichingolo KIA/Nissan. Angels 1 ta aktual kampion i Souax 1 e supkampion.
E kampionato di sòfbòl hubenil ta konta ku partisipashon di 5 tim ku ta hunga 4 buelta preliminar, pues na total 16 enkuentro. E kompetensia regular ta durá 10 siman, siguí despues ku e weganan di ‘play-off’.
Den e promé enkuentro Souax Gil’Sport a skor 9 kareda riba 5 hit. E ekipo no a kometé eror. Sta Rosa Angels Vanddis tabatin 2 kareda riba 4 hit i no menos ku 4 eror. Picher ganadó tabata Kiara Domacassé, mientras ku Tanisha Gil a terminá komo mihó bateado ku 1 hit den 1 turno.
E kampionato hubenil ta kontinuá mañan djasabra ku un asina yamá ‘double header’ pa 11’or di mainta i 1’or di tra’i mèrdia entre Souax 2 vs Sta Rosa 2. Miéntras ku 3’or Pichingolo ta enfrentá Souax 1.
Djadumingu tin otro ‘double header’, e biaha’ki entre Pichingolo i Sta Rosa 2 pa 11’or di mainta i 1’or tra’i mèrdia. Despues tin 3’or e enkuentro entre Souax 2 i Sta Rosa 1.