Janwe Spartacus ayera, djabièrnè 29 di mart 2019. a sali gana su promé wega den kategoria U20 di Curaçao Basketball Federation (Cubafe). E supkampion di aña pasá a superá Royal Hoops ku skor di 62-59. Willemstad Warriors a triunfá ku 46-36 riba Sharks.
E kampionato di Cubafe a kontinuá ayera den sala Errol Rooi di Sentro Deportivo Kòrsou (SDK) ku dos wega den kategoria U20. E hóbennan a trit e públiko riba algun bunita akshon.
Den e promé wega Jonatan Mercera a sobresalí pa Janwe Spartacus. Ela skor 17 punto pa asina guia su tim na e viktoria. Asina e supkampion U20 di aña 2018 a kuminsá e kompetensia riba bon pia. E basketbolista ku a destaká pa Royal Hoops tabata Thaynno Stephens. E tabata bon pa 14 punto.
Aytor Alberto den e di dos enkuentro ayeranochi a resultá e mihó hungadó pa Willemstad Warriors. Ela skor 17 dje 46 puntonan di su tim ku asina a superá Sharks ku 46-36. Pa e ekipo pèrdèdó Ivan Martijn tabatin mas punto di skor: 10.
E kampionato di Cubafe ta sigui awe ku diferente wega den tur kategoria den sala Errol Rooi di SDK na Brievengat. Den kategoria U20 tin e wega djis aki mitar di 6 entre Excel i Janwe Spartacus, pues kampion vs supkampion di 2018. Mas anochi, mitar di 8, den kategoria Senior tin e enkuentro planiá entre Montaña Spartans i Curaçao Trotters.