Treasure New Era a titulá kampion dje di 8 edishon dje Caribbean Women 35+ Softball Tournament. Ela pasa sinembargo den un sustu di otro mundu, ora ku Nos Goso a bini djatras hinkando 3 kareda pa empatá e wega na 7 kareda. E tim di Treasure finalmente tòg a gana lagando e kontrinkante den tereno: 8-7.
E di 8 edishon dje Caribbean Women 35+ Softball Tournament a tuma lugá den Frank Curiel Ballpark na Sta Maria. E torneo a kuminsá dia 25 i a tèrminá ayera djadumingu, 29 di sèptèmber 2019. El Consolador en T&B Unifoms a patrosiná e kompetensia.
E torneo pa sòfbolistanan di 35 aña i mas bieu (35+) a konta ku partisipashon di timnan for di Aruba, Boneiru, Kòrsou, St. Maarten i Hulanda. E representantenan di Kòrsou tabata Treasure New Era i Nos Goso. Splans a representá Aruba, Dutch Lions Hulanda, New Angels Boneiru i St Maarten tabata representá pa Upsettersz.
Den e final tabata Treasure New Era ku a pika dilanti ora ku ela skor 1 kareda den promé inen. Nos Goso a empatá e wega den su di dos turno (1-1) pa despues ku 2 kareda den di tres inen bai dilanti: 3-1.
Tur kos tabata mustra ku Nos Goso tabata bai gana e wega ora ku e tim a skor 1 kareda mas den di sinku inen: 4-1. Sinembargo Treasure New Era a eksplotá ku 4 kareda den bòm dje mesun inen aki pa asina bolbe pika dilanti ku skor di 5-4 pa despues hinka 2 kareda mas den di seis inen pa habri e wega foi otro 7-4.
Nos Goso sinembargo a bòns bèk ku 3 kareda den kabes di su di shete turno pa empatá e wega: 7-7. Treasure New Era den su último chèns a skor 1 kareda i asina laga su openente den tereno (8-7) i kleim tambe e titulo kampionil.
Picher ganadó tabata Minerva Maduro. Sharon-Rose Delanoi tabata mihó batiadó ku 2 hit den 3 turno. Porsierto ku ela bati e hit di oro pa hinka e kareda ganadó. Sonairis Thielman tambe a bati bon ku 1 hit den 1 turno na bate.
Carlientje Cleopa a resultá e picher pèrdèdó. Melisa Rosalina a bati 2 hit den 4 turno, miéntras ku Tsade Joubert tabata bon pa 1 hit den 2 turno.
