E finalistanan den klase superior di Federashon Vòlibòl Kòrsou (FeVoKo) ta konosí. Den klase femenino Stakamahakchi i Shuatanari ta bai lucha pa e título kampionil, miéntras ku den maskulino e bataya final ta bai entre Xaverianen i Watakeli.
E weganan di semi final den klase superior di vòlibòl a kontinuá ayera, djadumingu 18 di mart 2018, den sala kubrí Errol Rooi di Sentro Deportivo Kòrsou (SDK) na Brievengat.
Den klase superior maskulino Xaverianen a hañele ta lucha fuertemente pa kita Green Tigers for di kaminda. E enkuentro aki a bai e ruta kompletu: 3-2 na fabor di Xaverianen. E parsialnan tabata: 24-26, 25-19, 15-25, 25-19 i 15-13. E promé wega tambe Xaverianen a gana pa asina kaba e seri mihó di 3 wega ku 2-0 i pasa pa final.
Den e otro semi final den klase superior maskulino Watakeli a kaba ku tur aspirashon di Stakamahakchi. E wega aki tambe a bai sinku sèt kompletu i pues a finalisá ku skor di 3-2. E parsialnan tabata: 16-25, 25-22, 25-23, 20-25 en 7-15. Watakeli tambe a triunfá den e promé enkuentro pa asina kaba e seri mihó di 3 wega ku 2-0 i pasa pa final.
Den klase superior femenino Stakamahakchi a gana tambe e di dos enkuentro den e semi final kontra di Hurricane. E wega a terminá ku skor di 3-0. Den prinsipalmente di dos sèt Hurricane a duna tremendo bataya. E parsialnan tabata: 25-15, 27-25 i 25-10.
Den e otro wega di semi final den klase superior femenino Shuatanari ta superá pa di dos biaha Watakeli i asina sigurá su partisipashon den final. E enkuentro aki a kuninsá ku Watakeli ganando e promé sèt ku skor pèrtá di 25-23. Shuatanari despues a gana 3 sèt siguí ku 25-22, 25-16 i 25-10 pa asina registrá un triunfo ku skor di 3-1.
Awenochi, djaluna 19 di mart, tin kontinuashon dje semi final den klase A maskulino den sala kubrí Errol Rooi na SDK. Esaki ta bai entre Watakeli i Titus. E seri ta 1-1 i pues e ganadó lo pasa pa final kontra di Green Tigers.
