Jong Holland a posishoná su mes sólido na promé lugá dje kampionato di futbòl. E ekipo trikolor tin awor 16 punto for di 6 enkuentro i a alehá su mes for di demas timnan den Liga MCB. Ela gana tambe di ‘Vriendschap Eendracht Sterken Tegen Alles’ (VESTA): 2-1.
Den wikènt tras di lomba tabatin otro seri di weganan di futbòl den promé divishon di Federashon Futbòl di Kòrsou (FFK), esta Liga MCB. Esakinan a tuma lugá manera entre tantu ta kustumber den Stadion Antoine Maduro na Kintjan.
Jong Holland a kontinuá ku su racha viktorioso, ora ku ela gana djasabra ku 2-1 di VESTA. Jurensley Martina i Kenneth Kunst a skor pa e Trikolornan, miéntras ku Vurgel Bekeer a salba honor pa e ekipo di Buena Vista i besindario.
Esei tabata e di 5 viktoria den 6 wega pa Jong Holland, ku pues awor tin 16 punto. E úniko tim ku a kita punto for di e Trikolornan ta Victory Boys via di un empate: 0-0.
Awe djadumingu, 17 di dezèmber, Hubentut Fortuna a registrá su promé triunfo pa e aña aki. E tim di Seru Fortuna a gana ku 2-1 dje aktual kampion di Kòrsou Centro Dominguito, ku te ainda a laga di deseá den komienso dje kampionato nobo.
Samuel Matheus na di 8 minüt di wega a pone Centro Dominguito dilanti i laga hopi fanátiko pensa ku e tim ta bai logra un triunfo fasil. Pero Godinez Fuentes na di 20 minüt a skor e gol di empate pa Hubentut Fortuna, miéntras ku na di 75 minüt Lisandro Trenidad ta seyá e viktoria pa e tim di Seru Fortuna.
Jong Colombia tambe a logra un viktoria importante awe djadumingu. E Samineronan a superá Victory Boys ku 2-0. Jean Carlo Torbed na apenas 3 minüt di wega a pone e tim di Boca Samí dilanti. Na di 64 minüt tabata Christopher Martha ku a hinká e di dos gol pa Jong Colombia.
Riba djasabra Centro Social Deportivo Barber i Union Deportivo Bándabou (Undeba) a empatá 2-2. Undeba a sali brabu ku 2 gol den promé tempu. E promé gol tabata na di 24 minüt i e di dos na di 27 minüt. Tur dos a keda di skor pa Jonathan Getruide. Den di dos mitar Centro Barber ta skor 2 gol via di Jeandrick Hugo na di 66 minüt i Ronathan Willems na di 84 minüt.
Djabièrnè Skèrpènè i Inter Willemstad tabata parse di bai parti punto, pero e tim di Kintjan i besindario den tempu di leshon ta hinka gol via di pinalti i gana e enkuentro. Stallone Isenia a skor e gol na di 90+ minüt.
Fotonan: FFK/Liga MCB