Jong Holland a kuminsá e ‘play-off’ entre seis tim, e asina yamá ‘Kaya 6’, ku un triunfo. E Trikolornan a gana awe, djabièrnè 11 di mei 2018, ku skor di 3-0 di Inter Willemstad.
Mayoria di wega dje bueltanan preliminar a tuma lugá den Stadion Dr Antoine Maduro na Kintjan. Tabatin algun enkuentro tambe den final dje di dos buelta den Stadion Ergilio Hato di Sentro Deportivo Kòrsou (SDK) na Brievengat.
E seri di enkuentronan entre e seis ekiponan a kuminsá awe den Stadion Ergilio Hato di Sentro Deportivo Kòrsou (SDK) na Brievengat.
Esaki ta despues ku e bueltanan preliminar a terminá ku Jong Holland na kabes ku 38 punto. Na di dos puesto a keda e tim di Vriendschap Eendracht Sterken Tegen Alles (VESTA) ku 30 punto. Centro Dominguito a kaba na di tres lugá ku 28 punto. Union Deportivo Bámdabou (Undeba) i Skèrpènè a terminá empatá na di 4 puesto ku 27 punto, miéntras ku Inter Willemstad i Victory Boys tambe pues a kaba e prekampionato empatá ku 26 punto.
Jong Holland a sali riba bon pia anotando dos gol den e promé tempu. Charlie Martina a skor na di 13 minüt, miémtras ku Randel Winklaar na di 21 minüt a amplia e ventaha. Jurensley Martina na di 81 minüt di wega a hinka e di tres gol kontra Inter Willemstad.