Sta Maria Pirates Chippie a gana ayera, djasabra 20 aprel 2019, e wega inougural dje kampionato nobo di divishon dòbel A di Federashon Beisbòl Kòrsou (Febeko). E kampion di Kòrsou a gana den di 11 inen i ku skor di 6-5 di supkampion Wild Cats Guardian Grouo/KJ74.
Despues di su tremendo selebrashon di su hubileo Febeko a ranka sali ayera ku e kampionato lokal den su divishon máksimo. E kompetensianan den klase A i hubenil ta kuminsá dia 4 di mei próksimo.
E kampionato nobo ta konta e aña aki tambe ku patrosinio di Aqualectra. E kompania di utilidat ta e patrosinadó mayó. E timnan partisipante tin komo patrosinadónan UTS-Chippie, Skènikèsh, Mangusá, Jeep i KJ74.
E intenshon ta pa e aña aki tambe hunga 6 buelta den divishon dòbel A i manera aña pasá tin wega den stadion Johnny Vrutaal na Rif, Tio Daou Ballpark na Zapaté i Parke Heintje Kool na Sta. Maria. Despues dje bueltanan preliminar ta sigui un seri di e asina yamá ‘playoff wild card’, weganan semi final di mihó di 5 wega i pa kaba ku seri final di mihó di 7 wega.
E promé wega di kampionato divishon dòbel A a bai entre kampion i supkampion ku ta respektivamente Sta Maria Pirates i Wild Cats. E enkuentro aki a tuma lugá despues di un seremonia kòrtiku den Stadion Johnny Vrutaal.
E Pushinan Brabu a kuminsá brabu tambe i skor 2 kareda den nan promé turno na bate. Despues di 2 inen sin skor, e Piratanan a empatá e wega ku 2 kareda den nan di tres turno pa despues bai 4-2 dilanti den di 4 inen.
Wild Cats despues di 8 inen sin skor mas kareda, a skor 3 kareda den di 9 inen pa asina bòltu e skor: 5-4. Ora fanátikonan a kere ku e tim ta bai gana e wega, Sta Maria den bòm dje inen ta logra empatá esaki na 5-5 i asina forsa e enkuentro bai èkstra inen. Tabata e Piratanan ku den di 11 inen a skor e kareda di triunfo lagando e Pushinan Brabu den tereno: 6-5.
Un nota remarkabel ta ku Wild Cats a bati 13 hit. Mujica (5-3), Kirindongo (4-3), Josephina (5-3) i Alvarez (4-2) huntu a dal 11 dje 13 hitnan dje supkampion. Apesar dje 11 hitnan aki, e kuarteto a emouhá solamente 3 kareda pa nan tim.
Sta Maria Pirates a kaba e wega ku 9 hit. E mihó bateadónan dje tim tabata Carolina ku 2 hit den 3 turno na bate i Lacrus i Gregorius, kada un ku tambe 2 hit pero den 5 turno.
Picher ganadó a resultá Carolina, miéntras ku Antonio a pèrdè.
E kampionato nobo den divishon dòbel A ta sigui djamars anochi ku e wega entre FireBirds Skènikèsh i Marchena Braves. Esaki ta kuminsá mitar di 8 na Tio Daou Ballpark.