Curaçao Vikings a gana su promé kompromiso den e kampionato nobo di basketbòl di Kòrsou ku a ranka sali ayera, djaweps 28 di mart 2019. Dutley Damas i Enrico Corsen huntu a skor 27 punto pa guia nan tim na un triunfo di 63-42 riba Seru Fortuna Brothers. Den e otro wega Janwe Spartacus a gana di Willemstad Warriors: 54-41.
Curaçao Basketball Federation (Cubafe) ta organisá e kampionato lokal di basketbòl. Tin kompetensia den kategorianan Senior, U20, U16, U14, U12 i U10. Riba e promé dia di kompetensia Cubafe a programá dos wega den kategoria Senior.
E kampionato di basketbòl ta hunga den sala Errol Rooi di Sentro Deportivo Kòrsou (SDK) na Brievengat. E weganan ta tuma lugá riba djaweps, djabièrnè i djasabra.
Den divishon superior, esta Senior, tin 6 tim. Esakinan ta Curaçao Vikings, Seru Fortuna Brothers, Willemstad Warriors, Janwe Spartacus, Montaña Spartans Curaçao Trotters. Un total di 5 ekipo ta kompetí den kategoria U20: Royal Hoops, Janwe Spartacus, Sharks, Willemstad Warriors i Excel.
E kompetensia den Senior ta konsistí di un buelta preliminar sigui pa ‘play-off’. E seri pre-final aki den Senior ta un asina yamá ‘best of 3’ kaminda ta protehá e timnan ku sali promé i di dos. Pues e ekipo ku sali na di tres lugá ta hunga kontra number 6 i number 4 kontra number 5. E ganadónan despues ta hunga semi final kontra number 1 i 2 i e ganadonan djesaki ta bai final.
Den kategorie di edat U20 tambe ta hunga un buelta preliminar sigui pa ‘play-off’ ku tambe ta konsistí di ‘best of 3’. Ta hunga semi final di tim number 1 kontra number 4 i number 2 kontra number 3. E ganadónan ta pasa pa hunga final.
E promé enkuentro dje kampionato di Cubafe den kategoria Senior a bai entre Curaçao Vikings i Seru Fortuna Brothers. Dutley Damas i Enrico Corsen a sobresalí pa Vikings ku a superá e tim di Seru Fortuna ku skor di 63-42. Damas a skor 14 punto i Corsen tabatin 13 punto. Pa Brothers tabata Yomil Ventura tabata bon pa 9 punto.
Den e otro wega Janwe Spartacus a gana di Willemstad Warriors ku skor di 54-41. Vishal Shah di Spartacus a kaba ku mas tantu punto di skor: 11. Sharif Sprockel i Verney Jansen kada un a hinka 12 punto den kousa pèrdí pa Warriors.
E kampionato di Cubafe ta sigui awenochti, djabièrnè 29 di mart, ku dos wega den kategoria U20. Den e promé wega Royal Hoops ta hunga kontra Janwe Spartacus. Sharks i Willemstad Warriors ta subi kancha despues kontra di otro.
Djasabra, 30 di mart, tin wega for di mitar di 2 tra’i mèrdia te ku 9or anochi den sala Errol Rooi di SDK. Ta hunga den tur kategoria, esta U10, U12, U14, U16, U20 i Senior.
