Sport.cw

Sponsored by

Sponsored by

Sponsored by

Undeba un pia den ‘Kaya 4’

Union Deportivo Bándabou (Undeba) ta ku un pia den ‘Kaya 4’. E tim a goliá awenochi, djabièrnè 8 di yüni 2018, Inter Willemstad ku skor di 4-0. Ku e triunfo aki e ekipo di Bándabou tin 6 punto i hopi mihó karta kompará ku Centro Dominguito.

Aktualmente e play-off entre 6 timnan den promé divishon di Federashon Futbòl di Kòrsou (FFK), esta Liga MCB, a drenta su fase final. Esaki ta konosí tambe komo ‘Kaya 6’.

É tres ekiponan ku a klasifiká kaba pa e di dos seri di weganan pre-final, esta ‘Kaya 4’, ta Jong Holland (10 punto), Skèrpènè, (8) i Vriendschap Eendracht Sterken Tegen Alles (VESTA) ku 7 punto. E lucha pa e di kuater puesto ta bai entre Centro Dominguito i Undeba.

E tim di Bándabou ta ku un pia bon ankrá den ‘Kaya 4’, ora ku ela gana awenochi ku 4-0 di Inter Willemstad. Apenas na di 2 minüt di wega Ruensly Leuteria a pone Undeba dilanti. Lendell Johanne na di 14 minüt a amplia e skor: 2-0. Den di dos tempu Leuteria a bolbe hinka gol. Esaki tabata na di 56 minüt. Finalmente Rudshairo Nicolaas na di 67 minüt a fihá e skor final na 4-0.

Ku e goliada aki Undeba a bòltu un saldo di gol negativo di -1 pa un positivo di +3. E tim tin 6 punto ku pues 9 gol na fabor i 6 kontra.

Centro Dominguito awor tin e tarea difisil pa mañan gana ku skor grandi di Skèrpènè pa asina tambe alkansá 6 punto meskos ku Undeba. E tim kampion tin awor aki un saldo di gol negativo di -2: 5 gol na fabor i 7 kontra.

 

Translate »