Sport.cw

Sponsored by

Sponsored by

Sponsored by

Victory Boys ta dal VESTA

Victory Boys ta habri 2018 ku un triunfo importante pa asina tuma distansia for dje último puesto. E tim di Noord Zapateer i besindario a gana awe, djabièrnè 5 di yanüari 2018, ku skor di 3-0 di ‘Vriendschap Eendracht Sterken Tegen Alles’ (VESTA).

Federashon Futbòl di Kòrsou (FFK) a kontinuá awe anochi ku e kampionato regular den promé divishon, esta Liga MCB. Esaki despues ku djaweps e kompetensia a reanudá den stadion Dr Antoine Maduro ku e enkuentro entre Jong Colombia i Hubentut Fortuna.

Jong Colombia ta hungando bon futbòl den su último weganan i dunando alabes muestra di rekuperashon. E tim Saminero a gana djaweps di Hubentut Fortuna ku skor di 2-0. Na di 30 minüt di wega Jean Carlo Torbed a pone e ekipo ariba i na di 67 minüt Gersinio Constancia a seyá e viktoria.

Danki na e viktoria ei Jong Colombia a logra alehá mas aún dje último puesto riba e tabla di posishon. E tim Saminero awor tin 7 punto for di 7 enkuentro, miéntras ku Hubentut Fortuna ta keda den sotano ku 3 punto.

Victory Boys awe djabièrnè a bolbe duna honor na su nòmber, ganando un wega mas. E tim di Pariba a derotá VESTA ku skor di 3-0. Tur e golnan a keda di skor pa Jonathan Libiana. Apenas na di 2 minüt ela habri e skor, pa depues oumentá esaki na di 48 minüt i finalmente ela anotá su di tres gol na di 70 minüt.

Ku e triunfo ei Victory Boys a subi bai okupá e di 6 puesto riba tabla di posishon den Liga MCB. E tim awor tin 8 punto, mesun kantidat di punto ku Centro Dominguito ku sinembargo tin un wega menos hungá. Apesar dje derota VESTA ta keda na di 2 puesto riba tabla di posishon ku 12 punto for di 7 enkuentro.

Translate »