E kompetensia di pinpòn pa tim di Kòrsou a konkluí den fin di siman. Back Spin a titulá kampion den Masters, miéntras ku den e divishon máksimo -esta klase A- Vidanova e konkistá e titulo.
Federashon Tènis di Mesa Kòrsou (FTMK) atrobe ta mira atras riba un eksitoso kampionato pa ekipo. Esaki a kuminsá den luna di ougùstus i pues a finalisá fin di oktober.
Un total di 5 ekipo e kompetí kontra otro den klase A. Den e divishon máksimo aki e timnan a hunga dos buelta regular i despues e final. E kompetensia den divishon Masters a konta ku partisipashon di 7 tim ku a hunga un buelta i despues semi final i final. Tur e weganan a tuma lugá den Sentro Rekreo Irene Moreno na Muizenberg.
Den klase A Donic i Vida Nova despues dje dos bueltanan preliminar a okupá e promé dos puestonan i pues a pasa pa final. Den Masters e tim di Barberia Chinto a gana den semi final ku skor di 3-2 di Watch Out pa asina klasifiká pa final. E otro finalista a bira Back Spin, ku pues den e semi final a superá Donic ku skor di 3-0.
Den e final den divishon A Donic i Vidanova a hunga un seri mihó di sinku wega. E kampion di Kòrsou Dimitri Leon a pone Donic dilanti ora ela gana den single ku skor di 2-0 di Henny Metri: 11-7 i 11-7. Devon Meilink a empatá e serie na 1 ganando ku skor di 2-0 di Jaysron Mathilda: 11-5 i 11-4.
Ravi Rajawani i Meilink despues a pone Vidanova 2-1 dilanti den e serie, ganando e wega dòbel di Leon i Sigmar Carmelia ku skor di 3-1. Esaki tabata un enkuentro hopi emoshonante i duru bringá ku sètnan di 19-17, 11-8, 7-11 i 11-2.
Vidanova pues tabata falta un viktoria mas pa bolbe titulá kampion, pero Donic di mes ainda tabatin su mihó hungadó aliniá: Dimitri Leon. Despues di a pèrdè e promé sètnan (9-11 i 8-11), Leon a demonstrá kalidat i perseveransia ganando e tres sigiuente sètnan (11-3, 11-6 i 11-7) pa asina empatá e seri na 2-2.
E último wega single pues a bira esun desisivo. E hoben Mathilda a hasi su máksimo esfuerso, pero Metry ku tin mas eksperensia a gana e enkuentro den tres sèt: 11-7, 11-7 i 13-11. Esaki a nifiká tambe ku Vidanova pa di dos aña konsekutivo a bira kampion den divishon A dje kampionato di pinpòn pa ekipo.
Den divishon Masters e tim di Back Spin a superá Barberia Chinto den final ku skor di 3-1. Hensley Wentwoord a pone Back Spin 1-0 dilanti ganando ku skor di 3-0 di Jacinto Zimmerman: 11-5, 14-12 i 11-5. Peter Wong a amplia e ventaha na 2-0 ganando su wega kontra Lucien Alberg tambe ku skor di 3-0: 11-7, 11-9 i 11-9.
Den wega dòbel Zimmerman i Alberg a gana ku skor di 3-1 di Wentwoord i Wong pa asina hasi e seri 1-2. E parsialnan tabata 11-6, 10-12, 11-9 i 11-7. Den e sigiuente wega single Wentwoord a topa Alberg i a gana e promé sèt ku skor di 11-6. Alberg sinembargo a rekuperá mesora i asta gana e sigiuente dos sètnan i asina pika dilanti 2-1: 12-10 i 11-9. Wentwoord ku lomba kontra di muraya a logra empatá e seri tòg 2-2, ganando e di kuater sèt ku skor di 11-4. Despues tambe ela gana e di sinku sèt ku skor di 11-8, pa asina Back Spin kleim e titulo kampionil. 7
