Xaverianen a bolbe sufri un derota serka Watakeli ku asina a sigui su racha viktorioso den divishon superior maskulino di Federashon Vòlibòl Kòrsou (Fevoko). E tim kampion di Kòrsou a gana ayera, djarason 27 di mart 2019, ku skor di 3-0 aunke ku tòg no tabata un triunfo fasil.
Fevoko a sigui ayera ku e kampionato ku porsierto ta dediká na Dito Ravenstein. Tabatin dos enkuentro den divishon superior den sala Errol Rooi di Sentro Deportivo Kòrsou (SDK) na Brievengat.
Aunke ku Watakeli a gana e enkuentro den tres sèt, tin ku remarká ku e kontrinkante a bende su kueru karu. Xaverianen a skor 20 òf mas punto den kada sèt, pero tabatin ku aseptá ku Watakeli ta mihó. E parsialnan tabata 25-21, 25-20 i 25-22.
Den divishon superior femenino tambe Watakeli a mira akshon. E tim aki tambe a gana den tres sèt di su kontrinkante, esta Green Jewels: 25-17, 25-9 i 25-20. E tim ganadó di Watakeli aki meskos ku esun den divishon maskulino ya a klasifiká pa semi final.
Por sierto ku den divishon A maskulino tambe Watakeli a presta bon i asta klasifiká pa final, despues ku ela superá Stakamahakchi djarason. Tabata un wega emoshonante ku a bai tres sèt: 25-20, 24-26 i 15-13. Den final e tim ta hunga kontra Warwarú.
Miéntras ku den divishon A maskulino tur kos ta kla pa kuminsá hunga final, djarason a start ku semi final den kategoria femenino. Stakamahakchi Guardian Group a superá Xaverianen ku skor di 2-0: 25-22 i 25-18. Den e otro seri di semi final Shuatanari a bin djatras pa gana den tres sèt di Hurricane: 19-25, 25-19 i 15-12.