Watakeli a bolbe gana ayera, djadumingu 24 di mart 2019, i asina konsolidá su posishon number 1 den divishon susperior maskulino di Federashon Vòlibòl Kòrsou (Fevoko). Hurricane den tremendo demonstrashon a gana di Shuatanari den klase superior femenino.
E kampionato di Fevoko ku ta dediká na Dito Ravenstein, a sigui ayera djadumingu ku kuater wega den sala Errol Rooi di Sentro Deportivo Kòrsou (SDK) na Brievengat. Esaki tabata tres enkuentro den divishon superior i un wega den klase A femenino.
Den divishon superior maskulino Watakeli a sigui dominá e kompetensia. E tim a gana ku skor di 3-0 di Stakamahakchi. E parsialnan tabata 25-19, 25-19 i 25-17. Ku e triunfo aki Watakeli ta sigui sólido na promé lugá den e divishon aki.
Den otro wega di divishon superior maskulino e tim di Titus a triunfá ku skor di 3-1 riba Green Tigers. E promé sèt a bai pa Titus ku skor di 25-14. E Tigernan Bèrdè a empatá e wega ganando e di dos sèt ku 25-19. Despues tabata Titus ku a dominá e enkuentro ganando e di tres i kuater sèt ku respektivamente 25-14 i 25-19.
Den divishon superior femenino e wega entre Shuatanari i Hurricane a hala hopi antenshon. Despues di a pèrdè e promé sèt ku skor di 19-25, Hurricane a bin fuerte den di dos sèt ganando esaki 25-21 pa asina empatá e enkuentro na 1-1. Apesar ku Shuatanari a duna bon bataya den di tres sèt, ela pèrdè esaki ku 25-27. Hurricane den di kuater sèt di forma rutinario a kaba ku tur aspirashon dje kontrinkante: 25-19.
Den klase A femenino Stakamahakchi a gana ku skor di 2-0 di Xaverianen. E parsialnan tabata 25-21 i 25-14.
E kompetensia di Fevoko ta sigui awe nochi,djaluna 25 di mart, ku e seri di semi final den klase A maskulino. Watakeli i Stakamahakchi ta topa otro. Tur dos tim tin 1 triunfo i 1 derota. Esun ku gana awenochi ta pasa pa final kontra di Warwarú ku anteriormente a gana su semi final kontra di Titus.
