Wild Cats Guardian Group/KJ74 ayera a bati Marchena Braves 12-5 i bai 2-1 dilanti den semi final di Liga Aqualectra. E kampion di Kòrsou den di seis inen a kaba ku tur ilushon dje kontrinkante den un wega kaminda mènedjer Chado Obispo a hañ’é ta pone òrdu den su tim pèrdèdó.
E di tres wega di semi final entre Wild Cats i Marchena Braves a tuma lugá den Stadion Johnny Vrutaal. E Pushinan Brabu a gana e promé enkuentro 8-7 i pèrdè e di dos 15-3.
Marchena Braves den e di tres wega mesora krusa plato dos biaha den su promé turno: 2-0. Den di dos inen e tim a bolbe skor 1 kareda pa hasi e wega 3-0. E Pushinan Brabu sinembargo a kontestá ku 2 kareda den bòm di mesun entrada: 2-3.
Den di tres turno Marchena ta bolbe amplia e skor ku 1 kareda (4-2), pero Wild Cats den bòm dje di tres inen aki a logra empatá e wega: 4-4. Esaki a sosodé despues di un suseso interno den Braves kaminda mènedjer Obispo a saka su picher fo’i wega, pasobra esaki huntu ku su kècher sin konsultá a disidí na boliá e bateadó na turno.
Despues di un inen sin kareda, Marchena Braves a bolbe skor den di sinku i bai ariba 5-4. Den bòm dje entrada e Pushinan Brabu sinembargo ta bòltu e skor ku 2 kareda i pa promé biaha pika dilanti: 6-5. Marchena Braves despues por a empatá e wega, pero e koredó na tersera base a dudá i no a skor pa finalmente e kampion di Kòrsou eksplotá ku 6 kareda den di seis inen: 12-5.
Picher Richard Moesker a gana e wega despues di a relevá picher habridó Sidney Antonia den di 2 inen. Yurendell de Caster i Levi Carolus a sobresalí na bate pa Wild Cats. De Caster a bati 3 hit den 5 turno, miéntras ku Carolus tabata bon pa 2 hit den 4 turno i 3 kareda empuhá.
Pa Marchena Braves sinku picher a mira akshon i esun ku a pèrdè e wega a resultá Quincey van Blarcum. E picher habridó tabata Joel Suares, siguí pa Quinton Willems, Van Blarcum, Rowensly Bonifacio i Brianson Benita. E mihó bateadónan tabata Jeandimar Ignacio i Nahim Attaf. Ignacio a kaba ku 1 hit den 1 turno i ‘2 base por bola’, miéntras ku Attaf a bati 2 hit den 4 turno i empuhá 2 kareda.
