Wild Cats Guardian Group/KJ74 awe, djadumingu 28 di aprel 2019, no tabatin kompashon ku Marchena Braves: 13-1. Den otro wega Sta Rosa Indians ENNIA/Jeep a gana pèrtá di Royal Scorpions Mr Baseball CPS/AGT: 8-7.
Federashon Beisbòl Kòrsou (Febeko) a kontinuá awe ku e kampionato den dòbel A ke dos wega den Stadion Johnny Vrutaal na Rif. Ta trata e di 5 i 6 enkuentro dje kompetensia nobo ku atrobe ta patrosiná pa Aqualectra.
Den e promé wega ku a hunga den oranan di mainta Sta Rosa Indians a sali tuma ventaha di 2-0 den promé inen. Scorpions den su di dos turno ta empatá e wega na 2-2, pero den bòm di mesun inen e Indjannan ta bolbe skor 2 kareda: 4-2.
Ku 1 kareda mas den di tres inen e Indjannan a ampliá nan ventaha na 5-2, pero e Skòrpiunnan a kòrta e ventaha bèk ku 1 kareda den nan di kuater turno na bate: 3-5. Den di seis inen Royal Scorpions a skor 3 kareda pa tuma ventaha di 1 kareda: 6-5.
E alegria tabata sinembargo di durashon kòrtiku pa Royal Scorpions, pasobra den bòm dje di seis inen Indians ku 2 kareda ta bolbe tuma ventaha: 7-6. E timnan a skor 1 kareda mas den respektivamente di shete i ocho inen i e wega a tèrminá 8-7 na fabor dje tim di Sta Rosa.
Picher ganadó tabata Quant. Su koleganan di tim Naar, Martina, Ustasia i Gibson a sobresalí na bate. Naar a dal 2 hit den 2 turno (2-2), miéntras ku e tres otronan tambe a bati 2 hit pero den 3 turno (3-2).
Picher Jamanika a karga ku e derota pa Royal Scorpions. Doran a bati 2 hit den 2 turno, miéntras ku Van Gurp, Bernadina i Goeloe a dal 2 hit den 3 turno.
E di dos wega a tuma lugá tra’i mèrdia. Despues dje promé dos inennan sin kareda, Wild Cats ta skor 2 kareda den su di tres turno: 2-0. E Pushinan Brabu den di kuater inen ta krusa plato shete biaha i amplia e ventaha na 9-0. Despues ku Marchena Braves a skor 1 kareda den di sinku entrada, Wild Cats ta hinka 4 kareda den di 6 inen i ku despues di shete inen a resultá e skor final via di nòkout: 13-1.
Picher Antonia a gana e wega. Ela pèrmití solamente 1 kareda i 5 hit den seis inen di trabou. Su kompañeronan Faneyte i Hendrick a destaká na bate, kada un ku 2 hit den 3 turno (3-2).
Suares ku a kuminsá riba montikulo pa Marchena Braves a pèrdè e wega. Den 2,1 inen ela pèrmití 2 kareda riba 3 hit. Paulina, Liberia i Sloop a bati 1 hit den 1 turno na bate: 1-1.
Despues di 6 wega, Sta Maria Pirates Chippie ta na kabes ku 2 triunfo sin derota, siguí pa Sta Rosa Indians ku 1 viktoria tambe sin derota. Wild Cats tin 1 wega ganá i 1 pèrdí. Royal Scorpions i Marchena Braves tambe tin rèkòrt di 1-1.
