Wild Cats a kuminsá e kampionato di beisbòl dòbel A brabu ganando dos wega for di Royal Scorpions. E tim a bini dja’tras djasabra pa derotá e Skòrpiunnan den di 10 inen ku skor di 9-8. Un dia despues e Pushinan Brabu a nòkout e mesun kontrinkantenan ku skor di 17-0.
Federashon Beisbòl di Kòrsou (Febeko) a dediká e kampionato nobo na Kenneth Gijsbertha. E veterano dirigente ta ligá ku Sta Maria Pirates i a fungi komo mènedjer dje tim aki den pasado. Fuera di ta aktivo komo dirigente di beisbòl, e ta prominente miembro di partido MAN i a fungi te ku resien komo minister di Finansa den kabinete Rhuggenaath.
Den e promé wega di kampionato Royal Scorpions a skor 1 kareda den di dos inen pa bai 1 pa nada dilanti. Wild Cats na su turno a empatá e wega den bòm di kuater inen: 1-1. Sinembargo e Skòrpiunnan den kabes dje di sinku inen ta bolbe tuma ventaha anotando 4 kareda: 5-1. E Pushinan Brabu den bòm dje mesun sinku inen ta hinka 2 kareda pa hasi e wega 5-3.
Ku 1 kareda den di shete i 2 den di nuebe inen tabata parse ku Scorpions tabata bai gana e wega ku skor di 8-3. Sinembargo Wild Cats den bòm di nuebe inen ta skor 5 kareda pa empatá e wega i fòrsa èkstra inen. Mientras ku Scorpions no a skor, e Pushinan Brabu si a hinka 1 kareda pa asina gana e enkuentro: 9 pa 8,
Nuebe picher a mira akshon den e wega di aperture: kuater pa Royal Scorpions i sinku pa Wild Cats. Alexander Rodriguez ku a drenta den di dies inen a gana e wega pa e Pushinan Brabu. Porsierto ku e tabata tambe e mihó batiadó di wega ku 3 hit den 5 turno. Un di su hitnan tabata un homerun.
Riba djadumingu tabatin dos wega. Den e promé wega Sta Maria Pirates tabata gana ku skor di 7 pa 1 den tres inen riba Sta Rosa Indians. E tim a
asta amplia e skor den kabes dje di seis inen na 11 pa 1. E Indjannan sinembargo no a entregá i a skor 4 kareda den bòm dje mesun seis inen aki, 3 kareda den di shete i 1 kareda den di ocho pa hasi kòrta e ventaha di e Piratanan: 12 pa 9. Den bòm di nuebe inen Sta Rosa ta krusa plato atrobe kuater biaha pa laga Sta Maria den tereno ku skor di 13 pa 12.
Den e otro wega Wild Cats i Royal Scorpions a bolbe topa otro. E biaha’ki e Pushinan Brabu no tabatin niun kompashon. Nan a skor 17 kareda den kuater inen pa nòkout e Skòrspiunnan: 17-0. Asina e tim a habri kampionato nobo ganando su seri di dos wega.