Wild Cats Guardian Group ayera, djasabra 25 di novèmber 2017, a bolbe gana e titulo kampionil den klase superior di Federashon Beisbòl di Kòrsou (Febeko). E tim a superá Sta Maria Pirates Chippie ku skor di 11-9 den e di 7 alabes último wega di final.
E kampionato di beisbòl den klase AA ku a kuminsá riba 8 di aprel dje, ayera porfin a yega na un fin. Despues dje bueltanan preliminar i semi final, tabatin hopi insidente ku a deslusí i trese tardansa den e seri final.
Un desakuerdo den e kaso dje hungadó Curtley Doran di Sta Maria Pirates, a pone ku for di djaweps 5 di oktober a para e di 6 wega dje seri final. Promé ku e dia enkuestion aki Wild Cats tabata dilanti 3-2 den e ‘playoff’.
Febeko a disidí ku ta kontinuá ku e final riba djaweps 19 di oktober, pero e enkuentro aki tampoko a sigui. Esaki pa motibu ku Sta Maria Pirates a keda insistí ku Doran den su alineashon, siendo ku Komishon di Apelashon di Febeko a konfirmá su suspenshon for dje seri.
Direktiva di Febeko, presidí pa Micheline Heyliger, a sigui pèrsistí i finalmente a haña tur nanishi den mesun direkshon pa kontinuá ku e final promé ku aña bòltu. Riba djaweps 23 di novèmber a hunga finalmente e di 6 enkuentro dje final. Sta Maria Pirates a gana e wega aki ku skor di 7-5 pa asina empatá e seri na 3-3.
Ayera, djasabra 25 di novèmber, pues tabatin e di 7 alabes último enkuentro dje seri final. Esaki wega aki tambe a tuma lugá den Tio Daou Ballpark. Tantu djaweps komo ayera vários dje hungadónan di Kòrsou ku ta militá den timnan di Liga Grandi, tabata presente.
Apesar dje bon ambiente den Tio Daou Ballpark i tambe e wega hopi emoshonante, tòg tabata reina malkontentu den Sta Maria Pirates. E asuntu a bai dje leu ei ku niun dirigente ni hungadó dje tim pèrdèdó aki no tabata presente na entrega di premio despues dje enkuentro.
For dje promé turno na bate Wild Cats a demonstrá ku ela bin pa prolongá su titulo kampionil i a skor 4 kareda. Ku 3 kareda den di 4 i 5 entrada, e tim a amplia su ventaha na 10-1 i asina sigurá e triunfo.
Sta Maria a skor 5 kareda den di 6 ining pa kòrta e desventaha: 6-10. E Piratanan no kier a entregá i a keda hinka kareda: 1 den nan di 7 i 2 den di 8 turno na bate pa hasi e skor 9-10. Ku esaki nan a mantené e speransa bibu pa purba empatá e wega den di 9 ining òf asta gana, pero e Pushinan Brabu a hinka un kareda di siguransa den kabes dje último entrada i asina bai kas ku e viktoria i e titulo kampionil: 11-9.
Pa Wild Cats: 11 kareda, 7 hit i 1 eror. Picher Ruderly Manuel a gana e wega, tirando 5,2 ining den kua ela pèrmití 6 kareda i 3 hit. Ela tira 5 base por bola i a ponchá 4 bateadó. Su kompañeronan di ekipo Raywendley van Gurp i Ardley Jansen tabata e mihó bateadónan. Van Gurp a dal 2 hit den 3 turno, empuhá 3 kareda i skor tambe 3 kareda. Jansen a konektá 3 hit den 5 turno i a empuhá 4 kareda.
Pa Sta Maria Pirates: 9 kareda, 7 hit i no menos ku 5 eror. Picher pèrdèdó a resultá Claysandy Hariquez. Sherman Lacrus tabatin mihó sifranan di bateo: 2 hit den 3 turno ku 2 kareda empuhá. Johannes Gregorius Jr a dal 1 homerun den e enkuentro aki.
