Wild Cats Guardian Group/KJ74 i Sta Maria Pirates Chippie ta hunga atrobe den final di beisbòl dòbel A, esta Liga Aqualectra, kontra di otro. Nan a gana den semi final di respektivamente Marchena Braves i Sta Rosa Indians ENNIA/Jeep. Tur dos seri a bai kuater wega.
E final dje kampionato lokal bou di ouspisio di Federashon Beisbòl di Kòrsou (Febeko), pues ta un ripitishon di aña pasá. Wild Cats ta aktual kampion i Sta Maria supkampion.
E Pushinan Brabu i Marchena Braves djasabra’nochi a hunga nan di kuater wega di semi final kontra di otro. Esaki a tuma lugá den Stadion Johnny Vrutaal riba Rif, Otrobanda.
For di promé inen Wild Cats a pika dilanti ku 3 kareda kontra di picher Frank Moron di Marchena Braves. E kampion di Kòrsou den su di sinku turno a skor 2 kareda mas. E tim di Marchena a hinka 1 kareda den di 4 inen i atrobe 1 den di seis entrada.
Picher Ruderly Manuel a bai e ruta kompleto (9 inen) pa Wild Cats pa asina kleim e viktoria. Ela pèrmití 2 kareda riba 7 hit i ponchá 8 bateadó. E 2 karedanan tabata homerunnan solitario di Rochendrick Alexander i Jonathan Martijn di Braves. Randolph Kirindongo a sobresalí na bate pa e Pushinan Brabu ku 2 hit den 3 turno, di kua un doblete. Ela empuhá 2 kareda tambe.
Picher Frank Moron a pèrdè e wega pa Marchena Braves. Den kuater inen ela pèrmití 5 kareda riba 3 hit. Ela ponchá 1 bateadó pero a duna 6 ‘base por bola’. Nahim Attaf a bin na su lugá den di sinku inen i no a pèrmití kareda pero wèl 4 hit. Jonathan Martijn tabata mihó bateadó ku 2 hit den 3 turno, di kua pues un homerun solitario.
Ku e viktoria aki Wild Cats a gana e seri kontra di Marchena Braves ku 3-1 pa asina pasa atrobe pa final. E kampion di Kòrsou a gana e promé wega, pèrdè e di dos i despues gana e di tres i kuater wega.
Awe djadumingu Sta Maria Pirates tambe a sigurá su pase pa final, ganando ku skor di 7-3 di Sta Rosa Indians. E wega aki a tuma lugá den Parke Heintje Kool.
Tantu Sta Maria komo Sta Rosa a skor 1 kareda den promé inen. Den nan di dos turno e Piratanan ta pika dilanti: 2-1. Di akinan a sigui un duelo di picheo entre Johan Rifaela i Jordan Lucas ku a dura te ku shete inen, kaminda niun di dos no a pèrmití mas kareda.
Tabata den di 8 inen ku Sta Maria a skor 4 kareda i habri e skor: 6-1. Sta Rosa a kontestá ku 1 kareda den bòm dje mesun inen i despues tur dos tim a skor 1 kareda den nan di nuebe turno: 7-3 na fabor di e Piratanan.
Picher Rifaela a kleim e viktoria. Den nuebe inen ela pèrmití 3 kareda riba 9 hit i a ponchá 5 bateadó. Sherman Lacrus a bati 3 hit den 5 turno, miéntras ku Tarik Campagnard i Sorick Libera a dal 1 hit den 1 turno.
Picher Lucas a sufri e derota pa Sta Rosa. Den 7 inen ela pèrmití 2 kareda riba 9 hit. Den di 8 inen Geviohn Piternella a drenta na su lugá, pero no a saka out i pèrmití 3 kareda. Ramses Jamanika a relev’é pero tambe a pèrmití 2 kareda.
E seri final entre Wild Cats i Sta Maria Pirates ta kuminsá djasabra 13 di oktober den Stadion Johnny Vrutaal. Ta trata di un asina yamá ‘best of 7’, esta e tim ku gana 4 wega ta bira kampion.
