Liga Pariba den wikènt tras di lomba a pika dilanti den e seri di weganan di selekshon den divishon Intermediate. E tim a gana ku skornan di 9-6 i 9-8 di Liga Pabou.
E enkuentronan ta kai bou di e organisashon di Curaçao Little League. E seri di weganan den divishon Intermediate a keda hungá djasabra i djadumingu den Post 6 Ballpark na Rio Canario.
Den e promé wega djasabra Liga Pabou parse tabata bai logra un triunfo fasil riba Liga Pariba. E selekshon di Pabou a skor 2 kareda den di promé i di tres entrada i despues 1 kareda den tantu di kuater i sinku turno na bate i pues a kuminsá di seis komodo dilanti: 6-0.
Liga Pariba sinembargo a logra bini djatras pa gana e enkuentro. E selekshon a hasi esaki ku no mas ku 9 kareda den su último dos turnonan na bate: 3 kareda den su di seis entrada i den di shete entrada e tim a añadí 6 kareda mas.
Picher ganadó tabata D-sean Wederfoort mientras ku Nair Jamanika tabatin mihó sifra di bateo pa Liga Pariba: 1 hit den 1 turno. Maryelo Chirino tambe a bati e bala bon i a tèrminá ku 1 hit den 2 turno, miéntras ku ela empuhá 2 kareda.
Pa Liga Pabou Joshua Leito a resultá picher pèrdèdó, miéntras ku Mairoshendrick Martinus a sobresalí na bate ku 3 hit den 4 turno. Porsierto ela skor 3 kareda i empuhá 2 pa selekshon di Pabou.
Den e di dos enkuentro, djadumingu, Liga Pariba a sali brabu for di e proé turno na bate ku 5 kareda. Den di tres entrada e tim a skor 3 kareda i a seyá e triunfo den su di seis turno ku 1 kareda.
Liga Pabou den su di sinku turno na bate a empatá e wega na 8-8, despues ku e selekshon aki a skor 2 kareda den di dos entrada i 1 kareda den su di kuater turno na bate. Sinembargo e tim a haña 1 kareda kontra den di seis inen i pues a pèrdè e wega finalmente: 8-9.
E picher ganadó a resultá Nair Jamanika, miéntras ku Shurik Mouricia a bati 1 hit den 1 turno. E derota a keda skibí tras di nòmber di picher Mairoshendrick Martinus, miéntras ku Virgantly Rifaela tambe a terminá ku 1 hit den 1 turno.
