Den wikènt tabatin apertura ofisial di sòfbòl maskulino Liga 50. Esaki a tuma lugá den Cirilo Chirino Ballpark ku ta situá Tra’i Seru. Un total di 10 ekipo ta kompetí e aña aki pa e titulo máksimo.
Liga 50 ta keda presidí pa Iwan Loth. E timnan ku ta partisipá na e kampionato ta: Marlins, Ban Serio, Jaws, Lions, Sharks Baranka, Artemisia, Pitufos, Cat Power, Flamboyan i Sluggers.
E kampionato di Liga 50 e aña aki ta dediká na e baluartenan Edmund ‘Munchi’ Adelina, Hubert ‘Papi’ Bazoer, Siegfried Brunken i Oswald Elisa. E kuarteto aki tabata enkargá ku e aktonan di apertura ofisial. E kompetensia ta trata sòfbòl rekreativo slow pitch.
E weganan ta tumaa lugá tur djasabra. E próksimo enkuentronan ta programá riba djasabra 14 di aprel: 10or di mainta Cat Power vs Flamboyan; 12or mèrdia Sharks Baranka vs Jaws; 2or tra’i mèrdia Artemisia vs Marlins i 4or atardi Lions vs Pitufos.