E tim di Vriendschap Eendracht Sterken Tegen Alles (VESTA) tambe a klasifiká pa e di dos seri di weganan pre-final den promé divishon di Federashon Futbòl (FFK), esta ‘Kaya 4’. E ekipo di Buena Vista i bisendario a gana ayeranochi, djasabra 2 di mei 2018, ku skor di 2-1 di Inter Willemstad.
E kampionato di futbòl di Kòrsou den divishon máksimo di FFK, a hunga dos buelta preliminar i awor ta den ‘play-off’ ku ta konsistí di dos fase: seri di wega entre seis tim (Kaya 6) pa despues pasa pa e di dos etapa di weganan pre-final entre kuater ekipo (Kaya 4).
VESTA a bira e di tres tim ku ya a sigurá su partisipashon den e próksimo buelta di ‘play-off’, ora ku ela gana ayera di Inter Willemstad ku skor di 2-1. Stallone Isenia na di 13 minüt a pone e ekipo di Kintjan i bisendario dilanti: 1-0. Mirco Colina Jr na di 39 minüt a empatá e wega i Harold Vargas na di 46 minüt a sigurá e triunfo p’e tim di Buena Vista: 2-1.
E triunfo a nifiká ku VESTA a yega 7 punto for di 4 wega, ku ta produkto di 2 viktoria (riba i 1 empate. Fuera di Inter Willemstad, e tim a gana tambe di Centro Dominguito (1-0) i a empatá ku Skèrpènè 1-1.
Jong Holland tabata e promé tim ku a sigurá su klasifikashon pa ‘Kaya 4’. E tim trikolor tin tambe 7 punto, pero for di 3 enkuentro: 2 triunfo i 1 empate. E kampion dje kompetensia regular -esta e 2 bueltanan preliminar- den ‘Kaya 6’ a gana di Undeba (2-1) i Inter Willemstad (3-0), miéntras ku ela tabla 0-0 ku Skèrpènè.
Por sierto ku Skèrpène ku su viktoria di 1-0 djabièrnè ei riba Union Deportivo Bándabou tambe a klasifiká pa ‘Kaya 4’. E tim di Fraternan di Scherpenheuvel den ‘Kaya 6’ te ainda a gana 2 wega i tabla 2. Fuera di Undeba ela superá tambe Inter Willemstad (2-0) i a empatá pues ku Jong Holland (0-0) i VESTA (1-1).
Den e lucha pa e di 4 puesto den ‘Kaya 4’ e tim di Centro Dominguito tin mihó chèns, pasobra e tin ku hunga 2 wega i e otro timnan a sobra 1 wega só. E kampion di Kòrsou tin aktualmente 3 punto i sí e empatá òf gana awenochi di Jong Holland, elo keda ku e mihó kartanan. Sí e tabla ainda e tin un chèns mas pa klasifiká basta sí e gana di Skèrpènè riba djasabra 9 di yüni.
Undeba tambe tin chèns pa klasifiká ainda, pero esaki ta depende sí e gana di Inter Willemstad riba djabièrnè 8 di yüni aki i tambe riba prestashon di Centro Dominguito. Por sierto ku e kampion di Kòrsou ta hunga awenochi kontra di Jong Holland den Stadion Ergilio Hato di Sentro Deportivo Kòrsou (SDK) na Brievengat. E wega ta kuminsá 6’or di atardi.