E selekshon di futbòl di Kòrsou a konkistá e Kopa ABCS 2021, despues di derotá Boneiru ku skor minimo: 1-0. Rudrick Pop na di 76 minüt di wega a seyá e viktoria pa e tim lokal, ku a konsistí di hungadónan aktivo den divishon maksimo di Federashon Futbòl Kòrsou (FFK), esta Liga MCB.
Selekshonnan di Aruba, Boneiru i Kòrsou huntu ku e tim U20 di Kòrsou tabata e partisipantenan n’e torneo di futbòl ABCS. FFK a inkluí e selekshon U20 den e kompetensia, komo ku primeramente Sürnam i despues San Martin a kanselá nan partisipashon.
E torneo di futbòl a kuminsá djabièrnè, 1 di oktober, ku e wega entre e tim di U20 Kòrsou i selekshon di Boneiru. E enkuentro aki a sali 4 pa 3 p’e formashon boneriano.
Apenas na di 3 minüt di wega e hungadó Seinpaal a pone Boneiru dilanti 1-0. Martina 4 minüt despues a skor e gol di empate: 1-1. Na di 21 minüt Winklaar a pone e tim di U20 Kòrsou dilanti 2 pa 1, pero Windster na di 27 minüt a empatá pa Boneiru. Hierck na di 55 minüt a skor pa Boneiru bai dilanti 3-2, miéntras ku Bisiana na di 63 minüt a bolbe empatá e wega. Finalmente Winklaar na di 77 minüt a skor e gol di viktoria pa Boneiru.
Despues dje wega di apertura ei, a sigui e enkuentro entre selekshon nashonal di Kòrsou i Aruba. Tabata e hungadó Colina ku na di 17 minüt a pone Kòrsou dilanti 1 pa nada. Na di 21 minüt Sprockel a ampliá e skor.
Colina na di 48 minüt ta skor su di dos gol i hasi e wega 3 pa nada. Na di 56 minüt Peney ta skor e di kuater gol pa Kòrsou. Tres munüt despues Pop ta hasi e wega 5 pa nada, miéntras ku Rosa na di 64 minüt tambe ta skor: 6-0. Pop na di 65 minüt ta skor su di dos gol i ta hasi e wega 7-0. E úniko gol di Aruba a kai den tempu di leshon. Tabata Hodge ku a skor esaki.
E selekshonnan pèrdèdó a hunga ayera djasabra kontra di otro, esta Aruba kontra di U20 Kòrsou. E wega a tèrminá empatá na 2 gol i a pasa pa seri di pinalti. E rubianonan tabata mihó den tirunan penal i a gana e seri aki ku 4 pa 2.
Awe, djadumingu 3 di oktober, e selekshonnan di Boneiru i Kòrsou a topa otro pa e titulo kampionil. Kòrsou ku gol di Pop, su di tres den e torneo, a gana e Kopa ABCS. Porsierto ku e hungadó di Inter Willemstad ta aktual lider goliadó den Liga MCB di FFK. E tin 11 gol riba su nòmber.
Sport.cw a sòru pa ‘live streaming’ dje weganan dje torneo ABCS.
