E di 10 edishon di CuraSur International Masters Basketball Tournament ta ranka sali mañan, djadumingu 22 di oktober 2017, den sala di deporte di Sentro Deportivo Kòrsou (SDK) na Brievengat. Un total di 5 ekipo ta kompetí den e torneo aki.
Organisadó dje torneo internashonal di basketbòl ta Curacao Masters Tournament Foundation (CMTF). E fundashon aki ta selebrá e aña aki di 10 aniversario di CuraSur International Masters Basketball Tournament. Tur esaki ta posibel danki na e patrosinadónan prinsipal: Curacao Tourism Board (CTB), Massive Productions i De Ron Machine Shop.
Na aña 1984 a lanta un grupo di basketbolista ku a yama nan mes Old Timers i tabata bou di liderasgo di defunto Maurits ‘Papi’ Labast. E grupo a kuminsá entrená na St. Thomas College.
Despues di a rekruta hungador di e diferente teamnan di basketbòl di antes a disidi di invitá Sürnam pa algu wega di amistad di basketbòl. Entre 1984 i 2007 tabatin varios enkuentro entre Kòrsou i Sürnam. Esaki a kai masha na agrado i a disidí di hasiele un evento anual.
Na 2008 a lanta Curacao Masters Tournament Foundation (CMTF) ku e meta pa huntu ku Surnam organisá CuraSur International Masters Basketball Tournament pa hungadónan riba 35 aña. E torneo a wordu organisá na Kòrsou na 2008, 2009, 2012 i 2013, miéntras ku na Sürnam esaki a tuma lugá na 2010 i 2011. Komo ku mas pais a kuminsa puntra pa partisipá na e evento akí, e ultimo 3 añanan esaki a keda organisá na St. Maarten na 2014 i 2016 i na Guyana Frances na 2015.
E aña aki e torneo ta kuminsá mañan djadumingu 22 i ta dura te ku 27 di oktober den sala di deporte na SDK. E kompetensia ta dediká na defuntu Maurits ‘Papi’ Labast, kende a pasa pa un mihó bida aña pasá.
E paisnan ku a registrá pa partisipá na e di 10 edishon di CuraSur International Masters Basketball Tournament ta: Merka, Puerto Rico, Sürnam, Hulanda, St. Maarten i Guyana. Debí na e orkannan Irma i Maria, tantu St Maarten komo Puerto Rico a kanselá nan partisipashon. E timnan ku ta kompetí ta: Faverey Boys, Rock City Hoops, Sporthal Boys, Team Bordeaux i Curaçao All Stars.
Apertura ofisial dje torneo ta planiá pa 6or di atardi mañan djadumingu. E promé wega ta kuminsá mitar di 8 i ta bai entre Sporthal Boys i Faverey Boys i despues ta sigui 9or ku e enkuentro entre Curaçao All Stars i Team Bordeaux.
E torneo ta kontinuá djaluna ku 7or di anochi e enkuentro entre Rock City Hoops i Team Bordeaux. E di dos wega ta kuminsá mitar di 9 i ta Curaçao All Stars kontra di Sporthal Boys.
Riba e foto miembronan di direktiva di Curaçao Masters Tournament 2017