E kampionato di beisbòl Little League den Liga Willemstad, ta sigui wiként awor ku kuater wega. E kompetensia a ranka sali djadumingu, 17 di mart 2019, tras di lomba den stadion di Pòst 6 na Rio Canario.
Liga Willemstad ta un dje liganan di beisbòl hubenil di Kòrsou. E otronan ta Liga Pariba i Liga Pabou.
Svenska Martiszoon Bazur ta fungi komo direktor di kampionato di Liga Willemstad. E kompetensia ta konta ku partisipashon di 3 organisashon den divishon Little: Suffisant, Groot Kwartier i Marí Pampún.
E apertura dje kampionato di Liga Willemstad a konta ku un desfile kòrtiku pero kolorido. Tabatin animashon di un drumband ku a kompaña e hungadónan dje tres timnan partisipante.
E anja aki Liga Willemstad ta konta ku apenas 3 organisashon den e kategoria di Little pero esei no a impedi ku e direktiva a duna e muchanan un bunita apertura i ku na final di desfile tur mucha a risibi un pakete ku kontenido.
E promé wega di kampionato di Liga Willemstad djadumingu a resultá den un espektakulo emoshonante, kaminda e dos timnan no tabata ke baha kabes pa otro. Asta despues di e asina yamá ’tiebreak rule’, e wega a keda empata na 7 kareda. Suffisant: 7 kareda, 1 hit i 3 eror. Groot Kwartier: 7 kareda, 3 hit i 4 eror.
Den e di dos enkuentro Groot Kwartier ku pues tabatin un ‘double header’ a skor un total di 14 kareda, bati 14 hit i hasi 2 eror kontra Marí Pampún. Esaki ta promé biaha ku e bario aki ta kompetí ku un tim. Marí Pampún a skor 2 kareda, no a bati hit i tampoko no a hasi eror.
E kampionato di Little League di Liga Willemstad ta sigui djasabra awor 23 maart den stadion di Pòst 6. Pa 11or di mainta ta hunga kontra otro Groot Kwartier i Suffisant, miéntras ku pa 1or Suffisant ta bolbe subi tereno pero kontra di Marí Pampún. Djadumingu tambe tin dos wega: 11or di mainta Suffisant ta bolbe topa Marí Pampún i despues pa 1or Marí Pampun ta sali kontra di Groot Kwartier.
Liga Willemstad ta yama amantenan di beisbòl Little League bon biní pa mira e muchanan den akshon.