Sta Rosa Angels Vanddis a pika dilanti den serie final di sòfbòl femenino divishon máksimo di Curaçaose Softball Bond (CSB). E kampion di Kòrsou den un tremendo wega awe, djadumingu 30 di sèptèmber 2018, a gana ku skor di 5-2 di Pichingolo Nissan.
E seri final a kuminsá awe djadumingu den Buena Vista Ballpark, despues ku djabièrnè Pichingolo a klasifiká ganando di Eagles Softex ku skor di 9-2 den semi final.
Ku un dia di sosiegu picher strea Arnalda Margaritha a kuminsá riba montíkulo pa Pichingolo, miéntras ku Sta Rosa Angels a habri ku su estelar Leonella Elizabeth. Tur dos a dominá e bateadónan den promé inen dje enkuentro i tur kos tabata indiká ku e fanátikonan ta bai mira un duelo di picheo.
Sinembargo den di dos inen a presentá un hugada kaminda ku Pichingolo a faya den defensa. Ku base yen e segunda base ta laga un flai den kuadro kai, pero ta saka e koredó ku tabata bai segunda base tòg out. E koredó ku tabata na tersera base ta skor e promé kareda, miéntras esun ku tabata na segunda base tambe ta skor durante e konfushon ku a surgi.
E protesta dje tègnikonan di Pichingolo serka niun dje umpirenan no a prosperá. Finalmente riba un hit e terser kareda di Sta Rosa Angels a drenta: 3-0.
Den di tres inen tabata un koredó di Pichingolo ku a faya riba base i pone ku umpire a dekretá out reglamentario pa sera e inen. Angels den mesun di tres inen a dal picher Margaritha duru i skor 2 kareda despues di un doblete. E kampion di Kòrsou tabata menasá di skor mas kareda, ora ku tabatin hugada di robo ku a frakasá pa mal korementu di base i asina kibra un posibel rally: 5-0.
Den di kuater inen ku un koredó na base Chantal Nepomuceno ta bati homerun i hinka Pichingolo bèk den wega: 2-5. Sinembargo picher Elizabeth a rekuperá i dominá e sigiuente tres inennan ku yudansa di su kuadro e bateadónan di Pichingolo ku porsierto tambe despues tabatin dos hugada espektakular den outfield.
Picher ganadó pues a resulta Elizabeth, miéntras ku Kimberley Agard i Suheydy Faneyt a sobresalí na bate, kada un ku 1 hit den 2 turno. Picher Margaritha a sufri e derota i Chantal Nepomuceno a bati 2 hit den 3 turno, entre nan un homerun.
Ku Sta Rosa Angels Vanddis dilanti 1-0 den final, e seri ta sigui awor djaweps den Sabana Ballpark. E di dos wega di final aki ta kuminsá 8’or di anochi.
