Sport.cw

Sponsored by

Sponsored by

Sponsored by

Triunfo Wild Cats i Indians

Wild Cats Guardian Group/KJ74 i Sta Rosa Indians ENNIA/Jeep a gana nan promé enkuentro den semi final di dòbel A, esta Liga Aqualectra. E Pushinan Brabu a bini djatras pa laga Marchena Braves den tereno, miéntras ku e Indjannan a superá Sta Maria Pirates Chippie den inen èkstra.

Despues di 6 buelta preliminar, weganan di deskite i tambe enkuentronan di ‘wild card’, ayera -djasabra 29 di sèptèmber 2018- Federashon Beisbòl di Kòrsou (Febeko) a ranka sali ku ‘play-off’. E seri aki a habri ku Wild Cats (number 1) kontra di Marchena Braves (number 4) den Stadion Johnny Vrutaal.

Wild Cats a sali bai dilanti den su promé turno: 3-0. Ku kada biaha 1 kareda den inennan number 2, 3 i 4 Marchena Braves ta empatá e wega pa despues ku 4 kareda den di 5 entrada bai dilanti: 7-3.

E kampionnan di Kòrsou no a entregá i a kòrtá e ventaha den di 6 inen (4-7) pa despues skor 3 kareda den nan di shete turno pa empatá e wega: 7-7. Despues ku Marchena Braves fo’i di sinku entrada no a skor mas, Wild Cats den bòm di nuebe alabes último inen sí ta skor 1 kareda pa gana e wega: 8-7.

Picher Kennimar Martina a gana e promé wega di semi final pa Wild Cats. Ela relevá picher habrido Ruderly Manuel den di sinku inen i no a pèrmití kareda ni hit i a ponchá 6 bateadó. Randolph Kirindongo tabata e mihó bateadó ku 3 hit den 4 turno (4-3) i ela empuhá 2 kareda.

Risandro Pastor a resultá e picher pèrdèdó, ora ku den di nuebe inen el drenta di relevo i pèrmití 1 kareda riba 2 hit. Picher Frank Moron a habri e wega i a bai 6,2 inen permitiendo 7 kareda i 8 hit. Jason Libert a remplas’é den di 7 entrada i no a pèrmití kareda. Rileyson Liberia a bati 2 hit den 3 turno i empuhá 1 kareda pa Marchena Braves.

Awe, djaduingu 30 di sèptèmber, e seri prefinal a sigui ku Sta Maria Pirates (number 2) kontra Sta Rosa Indians (number 3). E enkuentro aki a tuma lugá den Heintje Kool Ballpark.

E Piratanan a habri e skor den nan promé turno na bate. E Indjanan a skor 2 kareda den di dos inen pa bai dilanti 2-1. Den bòm di mesun entrada Sta Maria ta bolbe skor 1 kareda: 2-2. Tabata te den di shete inen ku e Indjannan ta bolbe skor 1 kareda: 3-2. E supkampion den di nuebe alabes último inen ta skor atrobe 1 kareda pa empatá e wega: 3-3.

Esei a trese ku né ku e enkuentro a bai inen èkstra. E Indjannan a skor 2 kareda den nan di dies turno i bolbe bai dilanti: 5-3. E Piratanan a menasá pero a logra skor solamente 1 kareda den bòm dje inen, kua no tabata sufisiente i a pèrdè ku skor di 4-5.

Picher Marc Hennep a gana e wega pa Sta Rosa. Den di nuebe inen ela relevá picher habridó Jordan Lucas. Edmerson Cathalina tabata e mihó bateadó ku 2 hit den 3 turno. Picher Shair Lacrus a sufri e derota, miéntras ku Sherman Lacrus i Alexander Rodriguez a bati 2 hit den 5 turno pa Sta Maria.

E semi final ta sigui mañan djaluna ku e di dos wega entre Wild Cats i Marchena Braves den atrobe Stadion Johnny Vrutaal. E ta kuminsá mitar di 8 di anochi. Karchi pa hende grandi ta 5 florin i pa mucha te ku 12 aña i adulto di 60 aña òf mas ta 3 florin.

Translate »