Sta Rosa Angels Vanddis i Fenix Softex a gana plùs pèrdè un wega den kontinuashon dje kampionato di sòfbòl femenino AA den wikènt. Tabata otro seri di weganan di hopi bon nivel i tambe emoshonante.
Despues ku den siman Souax a laga Sta Rosa Angels den tereno ku skor di 2-1 ku hit di oro batí pa Rianthe Winklaar, den wikènt e muchanan di pariba na nan turno a laga Fenix Softex den tereno: 3-2.
E enkuentro tabata karakterisá pa un tremendo duelo di picheo entre Leonella Elisabeth i Suhedy Faneyt. E wega a asta bai èkstra inen ku Sta Rosa Angels anotando e kareda di viktoria.
Pa Sta Rosa Angels 3 kareda, 6 hit i 1 eror. Picher ganadó tabata Suheydy Faneyt, mientras ku e mihó batiadó tabata mesun Suheydy Faneyt ku a bati 2 hit den 4 turno. Fenix tabatin 2 kareda, 6 hit i 2 eror ku Leonella Elisabeth pèrdiendo e wega kontra su tim bieu, mientras ku mihó bate a resultá Loeyendra Valentyn ku 4-2.
Den un otro wega Fenix a kibra invikto di Souax ku skore di 2-0. E sifranan di Fenix tabata 2 kareda, 2 hit i 0 eror. Picher ganadó tabata Leonella Elizabeth i Susmailine Rifaela tabatin 1 hit den 2 turno. Souax tabatin 0 kareda, 1 hit i 1 eror. Picher pèrdèdó tabata Morina Rosa i miho bate Lyuska van ’t Kruys di 1-1.
Pichingolo KIA a bin djatras pa gana di Vipers ku skor di 13-6. Picher Julise Koffy a gana e wega’ki i mihó batiadó tabata Anais Piar ku 3 hit den 4 turno na bate. Picher pèrdèdó a resultá Meriell Torregrosa, mientras ku Jeanalis Bito a terminá komo mihó batiadó ku 2-1.
The Fighting Team a kibra un empate na 2 kareda den kabes di 5 inen anotando 7 kareda pa gana di Sta Rosa Vanddis ku skore di 9 pa 3. Picher ganadó tabata Sovienca Calmera i mihó batiadó pa The fighting Team a resultá Sharon-Rose Delanoy ku 3-2. Picher Suheydi Faneyt a sufri e derota i miho bate pa Sta Rosa Angels tabata Danisha Salesia ku 3-2.
Den kategoria maskulino tambe tabatin wega; Dream Team a gana di Suffisant Eagles ku skor di 13-4. Picher ganadó tabata Argenis Daal i mihó bate a resultá Nurison Leonora ku 2-2. Picher Raychel Sambo a sufri e derota i mihó batiadó tabata Gedeon Noor ku 1-1.
Suffisant Eagels despues a nòkout The Champs ku skor abultá di 20-2. Picher FarleyLard a gana e wega’ki, mientras ku mihó batiadó tabata Jeandimar Ignacio ku 4-3. Picher pèrdèdó a resultá Rujeandly Allee i mihó bate tabata Aldo Jansen ku 1-1.
Den klase femenino A tambe tabatin wega: Sta Rosa a gana di Dream Girls ku skor di 16-6. Picher ganadó: Danisha Salesia i mihó bate Gea-Ona Paulina di 3-2. Pa Dream Girls picher D’Yshanique Camelia a sufri e derota, mientras ku mihó bate tabata Gisaida Mercelina ku a bai di 2-1.
Pichingolo a gana Sta Rosa ku skor di 10-5. Picher ganadó tabata Arjenette Bernardus-Wernet i mihó bate Melanie Ostiana 1-1. Pa Sta Rosa picher Francheska Luciano a pèrdè, mientras ku mesun picher Francheska Luciano tabatin e mihó sifranan na bate: 2-2.
Finalmente Souax tambe a gana. E tim a derotá Dream Girls ku skor di 8-6 ku picher J’Dah Girigorie ganando e wega, mientras ku mihó bate a resultá Sinai- Marie Sofia ku a bai di 3-2. Picher D’Yshanique Camelia a sufri e derota i e mihó bate tabata Gisaida Mercelina ku 1 hit den 4 turno.
