Sta Rosa Angels Vanddis a kaba e promé buelta dje kampionato di sòfbòl femenino fast pitch den klase dòbel A invikto. E kampion di Kòrsou a gana den wikènt su di 5 enkuentro pa keda na promé puesto. Despues di a pèrdè e wega inisial dje kompetensia, Pichingolo KIA/Nissan a gana 4 wega siguí pa asina okupá e di dos lugá.
E último weganan dje promé buelta den kampionato di sòfbòl femenino den klase superior, a keda hungá den wikènt tras di lomba den Sabana Ballpark.
E siguente resultadonan a keda registrá: Eagles Softex vs The Fighting Team 10-2, Nos Tei Curaçao Office Supply vs demolition Cartel NV 12-2, Pichingolo KIA/Nissan vs Demolition Cartel NV 23-1, Sta Rosa Angels Vanddis vs Nos Tei Curaçao Office Supply 12-1 i The Fighting Team vs Nos Tei Curaçao Office Supply 10-3.
Despues dje promé buelta Kimberly Agard di Sta Rosa Angels Vanddis ta okupá e promé puesto den bateo ku un promedio di 667 punto. Na di dos lugá ta Julisse Koffy di Pichingolo KIA/Nissan ku 583 punto, miéntras ku Genevieve Hariquez tambe di Pichingolo KIA/Nissan ta bon pa 545 punto na di tres puesto.
Den kategoria di picheo Janiska Franklin di Sta Rosa Angels Vanddis tin mihó porshentahe di kareda limpi pèrmití (ERA): 0.78. Na di dos puesto ta picher Leonella Elizabeth tambe di Sta Rosa Angels Vanddis ku 0.88.