Sport.cw

Sponsored by

Sponsored by

Sponsored by

Beisbòl dòbel A ta sigui

E kampionato di beisbòl dòbel A ta sigui awenochi, djasabra 26 di mei 2018, ku e wega entre Fire Birds Citizen Insurance i Sta Maria Pirates Chippie. Esaki ta tuma lugá den Stadion Johnny Vrutaal despues ku djaweps ei Groot Kwartier Stars Mangusa a gana ku skor di 9-6 di Royal Scorpions My Malls.

 

E kampionato di beisbòl den klase superior ta hunga den Liga Aqualectra i ta keda organisá pa Federashon Beisbòl di Kòrsou (Febeko). E kompetensia a drenta di dos buelta.

 

Den e wega riba djaweps tantu Groot Kwartier Stars komo Royal Scorpions a kuminsá brabu den nan promé turno: 3-3. Den di dos inen Kwartier ta bai dilanti 4-3, pero e Skòrpiunnan den kabes di tres entrada ta empatá: 4-4. Den bòm di mesun inen e Streanan di Kwartier ta bolbe tuma ventaha (8-4) pa finalmente gana e enkuentro ku 9-6.

 

Picher ganadó a resultá Yerson Rosalina ku a drenta di relevo den di sinku inen. Den dos inen di trabou ela pèrmití solamente 1 hit. Marverich Lourens a kuminsá riba montíkulo i den 3,1 inen a pèrmití 6 kareda i 4 hit. Ela ponchá 3 bateadó i duna 7 base por bola.

 

Mihó bateadó pa Groot Kwartier Stars tabata Rogier Boeldak ku a dal 2 hit den 3 turno i empuhá 4 kareda. Stephan Vidal i Aldair Daal tambe tabatin un bon anochi den kaha di bateo. Kada un a dal 1 hit den 1 turno. E hit di Vidal tabata un homerun.

 

Bryan Biegel ku a kuminsá riba montíkulo pa Royal Scorpions a resultá e picher pèrdèdó. Den 1,1 inen ela pèrmití 4 kareda. Ela keda relevá den di dos inen pa Nazjir Geertruida ku tambe a pèrmití 4 kareda den 2,2 inen. Finalmente Rowensley Klaber a kaba e wega permitiendo e último kareda. 

 

Pues e kompetensia den Liga Aqualectra ta sigui awenochi den Stadion Johnny Vrutaal ku e wega entre Fire Birds Citizen Insurance i Sta Mari Pirates Chippie. E enkuentro aki ta kuminsá mitar di 8.

 

 

Translate »