Sta Rosa Angels Vanddis den wikènt tras di lomba a sigui su racha di viktoria den klase femenino superior di Curaçaose Softball Bond (CSB). E kampion di Kòrsou a gana 2 wega mas pa asina konsolidá su posishon invikto na kabes.
CSB a sigui den wikènt ku e kampionato ku weganan den tantu klase A i dòbel A. Esakinan a tuma lugá entre otro den Sabana Ballpark na Noord Zapateer.
Den klase dòbel A e tim di Sta Rosa Angels Vanddis a bolbe gana su dos weganan ku e tabatin riba skema. Esakinan tabata kontra Eagles Softex i The Fighting Team. Tabata e di 9 i di 10 triunfo sin derota pa e kampion di Kòrsou.
Sta Rosa Angels Vanddis primeramente a gana Eagles Softex ku skor konvinsente di 10-2. Picher ganadó a resultá Janiska Franklin. Suheydi Faneyt a sobresalí na bate ku 3 hit den 3 turno.
Picher Thisainy Statie a sufri e derota pa Eagles Softex. Almarisca Paula-Hooi, Nikaela Jacob i Yahaira Cornelis tabata e mihó batiadónan. Kada un a bati 1 hit den 2 turno.
Sta Rosa Angels i The Fighting Team despues a trit e fanatikonan riba un tremendo wega, kaminda e pichernan Leonella Elizabeth i Lee-Ann Craanberg a faha formal kontra di otro. Finalmente e tim kampion di Kòrsou a gana e enkuentro aki ku skor minino: 1-0.
Porsierto tabata den promé inen ku Sta Rosa Angels a skor e úniko kareda dje wega. Leonella Elizabeth ku a gana, a pèrmití solamente 1 hit i a ponchá 11 batiadó. Su koleganan di tim a sostenele ku 5 hit, di kua Suheydi Faneyt tabatin 2 hit den 3 turno i asina sera wikènt ku 5 hit den 6 turno.
Picher Lee-Ann Craanberg a karga ku e derota pa The Fighting Team. Tanusi Delando a bati e úniko hit pa e tim aki i a kaba wega ku 3-1.
Pichingolo Nissan a gana su di 5 wega dje kampionato e aña’ki, derotando Souax Gill’Sport ku skor abultá di 14-1. Picher ganadó a resultá Julisse Koffy, miéntras ku Michenou Marselia tabatin un dia perfekto den kaha di bateo ku 3 hit den 3 turno.
Picher Dianara Pieternella a sufri e derota. Tizony Raap tabata e mihó batiadó pa Souax ku 1 hit den 1 turno. Su tim a kaba ku 1 kareda, 3 hit i 3 eror, miéntras ku Pichingolo tabatin 14 kareda, 12 hit i 1 eror.
Den e último wega dje wikènt tras di lomba Nos Tei Curaçao Office Supply a gana su promé enkuentro den e kampionato. E tim a superá Souax Gill’Sport ku skor di 7-3. Tafari Janga a resultá e picher ganadó, anto Celeste Francisca a sobresalí na bate ku 2 hit den 2 turno.
Picher Dianara Pieternella a pèrdè e wega. Tanisha Gill tabata e mihó batiadó pa Souax ku tambe 2 hit den 2 turno.
Despues ku kasi tur tim a hunga dos buelta, esta 10 wega, Sta Rosa Angels Vanddis ta na kabes ku 10 triunfo. The Fighting Team ta okupá e di dos lugá ku 6 viktoria i 4 derota. Pichingolo Nissan ta na di 3 lugá ku 5 wega ganá i tambe 5 pèrdí. E di 4 puesto ta okupá pa Eagles Softex ku 4 viktoria i 5 derota. Souax Gill’Sport ta sigui na di 5 lugá ku 3 triunfo i 6 wega pèrdí, mientras ku Nos Tei Curaçao Office Supply ta último ku 1 wega ganá i 9 derota.
