Sta Rosa Angels Vanddis ayera, djaweps 20 di sèptèmber 2018, a klasifiká pa final di sòfbòl femenino dòbel A. E aktual kampion a superá Softex Eagles ku skor di 7-0. Picher Leonella Elizabeth a sobresalí den e wega aki lansando wega di 1 hit sin kareda.
E kampionato di sòfbòl femenino ‘fastpitch’ den divisihon máksimo di Curaçao Softball Bond (CSB) a kontinuá ayera ku dos wega den Frank Curiel Ballpark. Esakinan tabata valido pa ‘play-off’.
Den e promé enkuentro Pichingolo Nissan a gana ku skor di 6-0 di The Fighting Team i asina pasa pa semi final. Picher Arnalda Margaritha a pèrmití solamente 3 hit pa gana e wega’ki. Rigmayra Poulina a sali mihó bateadó di Pichingolo ku 1 hit den 3 turno, esta 3-1.
Picher Ruth-shainny Calmera a sufri e derota, miéntras ku Tanusi Delando a kaba ku 1 hit den 2 turno (2-1). Un nota remarkabel den e enkuentro aki ta ku Eagles Softex a hasi 7 eror.
Den e di dos wega di anochi Sta Rosa Angels ku picher Leonella Elizabeth den gran forma a superá Eagles Softex: 7-0. Ela pèrmití solamente 1 hit, miéntras ku Deidra da Costa Gomez tabatin un anochi perfekto na bate ku 3 hit den 3 turno: 3-3. Picher pèrdèdó tabata Shurdaney Obispo. Jahaira Cornelis a bati e úniko hit di wega pa Eagles Softex.
Danki na e viktoria Sta Rosa Angels a pasa pa final i ta warda awor pa hunga kontra di ganadó dje seri den semi final entre Eagles Softex i Pichingolo Nissan. Esaki ta kuminsá djadumingo awor pa 5’or di atardi den Buena Vista Ballpark.
Awenochi, djabièrnè 21 di sèptèmber, e kampionato maskulino ‘fast pitch’ den divishon máksimo di CSB ta sigui ku dos wega. Clase Aprte i Harlem Power ta hunga foi 8’or kontra otra, miéntras ku 10’or Dream Team ta topa Suffisant Eagles.
E kompetensia den klase A femenino ta sigui djasabra 22 di sèptèmber ku e wega entre Vipers i Souax Gills Sport. E enkuentro aki ta kuminsá mitar di 8 anochi den Buena Vista Ballpark.
