Sta Rosa Angels Vanddis ta un triunfo for di prolongashon di su titulo kampionil den sòfbòl femenino dòbel A. E tim a bolbe gana ayera, djaweps 4 di oktober 2018, di Pichingolo Nissan: 3-1. Leonella Elizabeth tabata grandi atrobe riba montíkulo.
E seri final di sòfbòl fast pitch femenino divishon máksimo di Curaçaose Softball Bond (CSB) a kontinuá ayera den Sabana Ballpark di Richard ‘Chati’ Constancia, ku e mes anunsiando e bateadónan i dunando informashon durante e wega. Un bon públiko atrobe tabata testigu di un tremendo enkuentro.
For di komienso tabata bisto ku e wega entre Sta Rosa Angels i Pichingolo lo bai bira un duelo di picheo. E tim di Pariba a kuminsá ku Leonella Elizabeth, miéntras ku Pichingolo a presentá ku su strea Arnalda Margaritha. Tur dos a dominá e bateadónan ku relativo fasilidat den promé inen.
Den di dos inen Sta Rosa Angels ku bon korementu di base i bateo oportuno ta skor e promé kareda. Tabata durante un hugada na segunda base ku umpire a kanta interferensia i asina e tim di Pariba a haña un koredo na tersera. Despues di un hit e koredó aki a skor promé ku un hugada na atrobe segunda base kaminda umpire a dekretá e di tres out.
Tur kos tabata mustra ku Elizabeth lo bai gana 1-0 mirando su kòntròl i lokashon di bala i den e kuadro aki tabata komuniká konstantemente ku su kècher. Pero riba un fayo den defensa den di kuater inen kaminda e rightfielder ta laga un flai kai, ta sigui un hit pa Pichingolo ku a logra kibra e blankeo dje picher aki: 1-1.
E wega a yega shete inen empatá na 1-1. Aki e tim di Pichingolo su defensa ku tabata bon durante seis inen, a komete erornan kostoso. Sta Rosa Angels a skor 2 kareda i bai dilanti 3-1. Di mes Leonella Elizabeth a pèrta brasa den bòm di mesun shete entrada i dominá Pichingolo pa e i su tim su di dos viktoria.
E seri final ta un ‘best of 5’ kua ta nifiká ku e tim ku gana 3 wega ta kampion. Sta Rosa Angels Vanddis pues ta 2-0 dilanti i falta un viktoria mas pa prolongá su titulo di kampion.
