Sta Maria Pirates Chippie mester di un viktoria mas pa pasa pa final di Liga Aqualectra. E supkampion di Kòrsou a gana ayera, djaweps 4 di oktober 2018, ku skor di 10-7 di Sta Rosa Indians ENNIA/Jeep i a awor ta 2-1 dilanti den semi final.
Federashon Beisbòl di Kòrsou (Febeko) a planiá e di tres wega dje serie entre Sta Maria Pirates i Sta Rosa Indians den Tio Daou Ballpark.
For di promé inen tur kos tim a skor. E Indjannan a habri e wega ku 1 kareda i e Piratanan a kontestá ku 2 kareda den bòm dje promé inen. Den su di dos turno na bate Sta Maria ta krusa plato tres biaha (5-1) pero Sta Rosa den di tres inen ta skor 3 kareda: 4-5.
Ku 1 kareda den tantu di 5 i 6 inen e Piratanan ta amplia nan ventaha na 7-4, pero e Indjannan ta habri nan di shete turno ku 3 kareda pa empatá e wega. E alegria sinembargo tabata kòrtiku pasobra Sta Maria den bòm dje mesun inen ta hinka 1 kareda: 8-7. Ku 2 kareda mas den di 8 inen e supkampion di Kòrsou ta fihá e skor final na 10-7.
Picher Shair Lacrus a gana e wega pa Sta Maria Pirates. E tabata e di tres picher ku a mira akshon riba montíkulo i a pèrmití solamente 2 hit sin kareda. Ela ponchá den 2,1 inen di trabou 4 bateadó. Ruendy Carolina a habri komo picher i den 6,1 inen a pèrmití 6 kareda riba 7 hit. Gedryon Basilia a relev’é i pèrmití 1 kareda riba 1 hit.
Sherman Lacrus i Rayshelon Carolina a sobresalí pa Sta Maria na bate. Lacrus a bati di 3-2, esta 2 hit den 3 turno. Carolina tambe a dal 2 hit, pero den 2 turno. Johannes Jr Gregorius a dal un homerun pa e Piratanan.
Picher Gionelo Jansen a pèrdè e wega. Ela drenta den di 3 inen di relevo pa picher habridó Marc Hennep ku den 2 inen a pèrmití 5 kareda riba 3 hit. Jansen tambe a haña 5 kareda kontra riba 5 hit. Ku 2 hit den 3 turno Derick Francisca a sali mihó bateadó pa Sta Rosa, miéntras ku Ildion Martina a dal un homerun den kousa pèrdí.
