Souax Softball Team tabatin apertura awe, djabièrnè 17 di novèmber 2017, di Torneo Candia Paulo-Felipa. Esaki a tuma lugá den Post 6 Ballpark na Rio Canario. E torneo a kuminsá ayera ku Rising Trotters i Warriors ganando nan promé wega.
Despues dje kampionatonan ofisial di Curaçaose Softball Bond (CSB), Souax Softball Team ta organisá un kompetensia partikular. Esaki sigur ta un tremendo inisiativa pa amantenan di sòfbòl disfrutá di tantu sòfbòl ‘fast pitch’ komo rekreativo.
Un total di 9 tim ta kompetí den Candia Paulo-Felipa Softball Tournament ku a kuminsá ayera djaweps 16 di novèmber den Post 6 Ballpark i a kontinuá awe djabièrnè i ta sigui mañan djasabra pa klousurá djadumingu 19 di novèmber. E ekiponan ta repartí den kategoria 35+ i Fast pitch U20.
Den kategoria 35+ tin 6 tim reparti den 2 pul. E ekiponan den pul A ta The Friends, Treasure New Era i Warriors. Den pul B ta hunga e timnan Nos Goso, Rising Trotters i Shining Stars. Kategoria Fast pitch U20 ta konsistí di 3 tim. Esakinan ta Pichingolo, Souax i Sta Rosa Angels.
Torneo Candia Paulo-Felipa a ranka sali ayera ku dos enkuentro den Post 6 Ballpark na Rio Canario. Tur dos tabata den kategoria 35+.
Den e promé wega di anochi Warrios a gana ku skor di 6-2 di The Friends den pul A. Warriors tabatin 6 kareda, 7 hit i 2 eror. Picher Maida Obispo a gana e enkuentro, mientras ku Ismairy Ignacio a sali mihó bateadó ku 2 hit den 2 turno. Picher pèrdèdó tabata Morela Osepa. The Friends tabatin 2 kareda, 9 hit i 4 eror.
Den e di dos wega di anochi Rising Trotters a gana ku skor di 19-13 di Shining Stars den pul B. Trotters tabatin 19 kareda, 24 hit i 3 eror. Picher ganadó a resultá Marie Windster, miéntras ku C. Carolina, Suvienka Calmera i Jurima Osepa a sobresalí na bate. Carolina a dal 4 hit den 4 turno, Calmera i Osepa tabatin 3 hit den 3 turno, di kua Calmera a dal tambe un homerun.
Shining Stars tabatin 13 kareda, 13 hit i 3 eror. Picher Solange Martina a pèrdè e wega, miéntras ku Celeste Francisca i Ruth-Shainy Calmera a kaba wega komo mihó bateadó. Francisca a dal 2 hit den 2 turno di kua 1 homerun i Calmera a konektá 1 hit den 1 turno. Fuera di Celeste Francisca, tambe Sonaiska Francisca a dal 1 homerun i Tanusi Delando a konektá dos bia e bala di homerun.
