Kenley Jansen tabatin un dia grandi ayera, djasabra 28 di oktober 2017, den Major League Baseball (MLB). E yu di Kòrsou a gana e premio di mihó relevista den Liga Nashonal, mientras ku despues ela salba su di 2 wega pa Los Angeles Dodgers kontra Houston Astros den Seri Mundial.
Promé ku e di 4 wega di Seri Mundial entre Dodgers i Astros, MLB a anunsiá ku e yu di Kòrsou Kenley Jansen ta ganadó dje premio di mihó relevista den Liga Nashonal. Den Liga Amerikano tabata Craig Kimbrel di Boston Red Sox ken a gana e premio.
E premio di mihó relevista den Liga Nashonal yama Trevor Hoffman National League Reliever of the Year Award, miéntras esun den Liga Amerikano yama Mariano Rivera American League Reliever of the Year Award.
Ta di dos aña konsekutivo ku Kenley Jansen ta gana e premio den Liga Nashonal. Ela sera temporada regular e aña aki ku 41 wega salbá, 5 triunfo sin derota, 109 ponche tirá, solamente 10 kareda limpi kontra i un porsentahe di kareda pèrmití di 1.32. Na 2016 e yu di Kòrsou a sera e temporada ku 47 wega salbá, 3 triunfo i 2 derota, 104 ponche tirá, solamente 14 kareda limpi kontra i un porsentahe di kareda pèrmití di 1.83.
E echo ku Kenley Jansen a gana e premio di mihó relevista den Liga Nashonal pa di dos aña konsekutivo, ta algu históriko. E ta e promé picher den MLB pa gana e award tras di otro. Craig Kimbrel di Boston Red Sox tambe a skibi historia, pasobra e ta e promé picher den MLB pa gana e award den Liga Nashonal (2014 ku Atlanta Braves) i awor den Liga Amerikano.
Durante anunsio i presentashon di su premio, Kenley Jansen tabatin hopi palabra di apresio pa Mariano Rivera ken ta èks relevista estelar di New York Yankees. E yu di Kòrsou tin un ‘fastball cutter’ paresido na esun di Mariano Rivera.
Mas lat despues Kenley Jansen tabata den akshon pa su tim, ora ku mènèdjer Dave Roberts a bolbe konfi’é ku e bala pa sigurá e viktoria pa Los Angeles Dodgers. Esaki tabata den di 9 entrada ku Dodgers 6-1 dilanti. Meskos ku den wega number 2 dje Seri Mundial, ayera tambe Kenley Jansen a pèrmití un homerun. E biaha aki di Alex Bregman. E yu di Kòrsou a logra dominí e otro 3 bateadónan di Houston i inkluso a registrá un ponche pa su di dos wega salbá den su promé Seri Mundial.
Alex Wood pa Dodgers i Charlie Morton pa Astros a trit e fanatikonan den stadion di Houston riba un bunita duelo di picheo. E picher di Dodgers te ku entrada number 6 tabata tirando un wega di no hit, no run. Tabata e sènterfilder i promé bate George Springer ku despues di 2 out den di 6 a dal’é un homerun i pone Houston 1-0 dilanti.
E alegria pa Astros tabata di durashon kòrtiku, pasobra den di 7 entrada Dodgers a empatá e wega via di Cody Bellinger. Den di 9 entrada tabata atrobe Bellinger ken ku un hit a pone Dodgers dilanti. Den mesun entrada Joc Pederson a dal un homerun ku 2 kompañero na base: 6-1. E homerun di Alex Bregman kontra Kenley Jansen a hasi e wega 6-2.
Ku e triunfo riba Houston Astros e tim di Kenley Jansen a empatá e Seri Mundial na 2. Awe nochi tin e di 5 wega i despues e seri ta muda bai Los Angeles atrobe. E pichernan pa awe nochi ta Clayton Kershaw di Dodgers kontra di Dallas Keuchel di Astros.
