Despues di 4 derota sigui kontra Sta Rosa Angels Vanddis den post temporada, Pichingolo Nissan ta logra gana su promé triunfo kontra e tim aki den final di klase superior femenino: 8-6. E di 4 wega final tabata planiá pa awe, djadumingu 29 di oktober 2017, pero a keda kanselá pa motibu di awaseru.
Sta Rosa Angels Vanddis awor ta 2-1 dilanti den e final den klase superior femenino di Curaçaose Softball Bond (CSB). E seri aki ta ‘best of 5’ i ta keda hungá den Post 6 Ballpark na Rio Canario.
Den e di 3 enkuentro final maneho di Pichingolo Nissan a bolbe manda su picher estelar Arnalda Margarita riba montíkulo. Ela guia su tim na un viktoria di 8-6. Picher pèrdèdó a resultá Suheydi Faneyt, miéntras ku e mes tambe tabata mihó bateadó ku 2 hit den 2 turno.
Den klase superior maskulino Dreamteam ta 2-0 dilanti den e seri final. Pues Suffisant Eagles ta lomba kontra di muraya den e seri aki ku tambe ta ‘best of 5’, esta e tim ku gana 3 wega ta kampion.
Pa motibu di awaseru lider di kampionato di CSB a suspendé e weganan di awe djadumingu i reprogramá nan. Sta Rosa Angels Vanddis i Pichingolo Nissan ta hunga e di 4 wega final mañan djaluna pa 8or di anochi, miéntras ku Dreamteam i Suffisant Eagles ta hungá nan di 3 wega final djamars 31 di oktober tambe pa 8or di anochi.