Kenley Jansen ayera, djadumingu 29 di oktober 2017, a sufri su promé derota e temporada aki den Major League Baseball (MLB). Houston Astros a gana di forma dramátiko den di 10 entrada di Los Angeles Dodgers (13-12) i awor ta 3-2 dilanti den Seri Mundial.
Den promé instante a parse ku Dodgers tabata riba kaminda pa gana e di 5 wega di World Series, ora ku e tim di Kenley Jansen for di promé entrada a tuma ventaha di 3-0. Den nan di 4 turno na bate e ekipo a añadí un kareda mas: 4-0.
Astros sinembargo den e di dos mitar dje di 4 entrada a empatá e wega na 4 kareda. Tabata Yuli Gurriel ku a sòru pa 3 dje karedanan aki, ora ela dal un homerun ku dos kompañero riba base kontra dje picher estelar di Dodgers Clayton Kershaw.
E timnan a skor despues 3 kareda den di 5 entrada: 7-7. E karedanan aki tabata danki na homerun ku 2 koredó riba base di respektivamente Cody Bellinger di Dodgers i Jose Altuve di Astros.
Den nan di 7 turno na bate, Dodgers ta skor un kareda pa bolbe tuma ventaha: 8-7. Den bòm dje mesun 7 entrada Astros ta bòltu e skor 11-8 via di 2 homerun ku a produsí 3 dje 4 karedanan. George Springer ta bati un solo homerun i despues Carlos Correa ku un koredó na base tambe a dal e bala den públiko den ‘outfield’.
E timnan a bolbe skor 1 kareda den di 8 entrada, di kual e kareda di Astros tabata un homerun di Brian McCann: 12-9. Den di 9 entrada Dodgers ta logra empatá e wega na 12 kareda. Yasiel Puig ku un homerun ku 1 kompañero riba base a sòru pa 2 dje karedanan aki.
Ku e wega pues empatá a pasa pa hunga prolongashon. Dodgers no a logra skor den e entrada èkstra aki, miéntras ku Astros sí a hasi esaki i gana e enkuentro: 13-12. Por sierto ku e kareda aki a drenta na man di Kenley Jansen, ken a drenta wega den di 9 entrada.
E picher yu di Kòrsou a saka 2 out i tabata falta pues 1 out pa sera di 10 entrada. Sinembargo ela deskontrolá i a dal Brian McCann ku bala (dead ball) pa despues e duna George Springer ‘base por bola’. Alex Bregman finalmente a dal Kenley Jansen un liña suave riba kabes dje ‘short stop’ riba kual e koredó na segunda a skor e kareda di triunfo.
E derota aki ta e promé ku Kenley Jansen a sufri e aña aki. Ela kaba temporada regular ku 5 triunfo i 41 wega salbá. Den e final di MLB aki kontra Astros e tabatin kaba 2 wegá salbá, aunke ku djarason 25 di oktober ela faya den konservá un ventaha di 1 kareda den wega number 2 dje Seri Mundial. E wega aki Dodgers a pèrdè despues ku 6-7.
Ku Houston Astros dilanti 3-2, e seri final ta muda bèk pa Los Angeles kaminda e di 6 enkuentro lo tuma lugá.