Sport.cw

Sponsored by

Sponsored by

Sponsored by

Sta Rosa Angels kampion

Sta Rosa Angels ayera’nochi, djaluna 30 di oktober 2017, a titulá kampion di Kòrsou den klase superior femenino. Den di 4 wega dje seri final e tim a gana konvinsente di Pichingolo Nissan: 14-6.

Curaçaose Softball Bond (CSB) por mira tras riba un kampionato éksitoso den klase superior femenino, esta dòbel A. E final a konsistí di un seri ‘best of 5’ i a tuma lugá den Post 6 Ballpark na Rio Canario.

Tur kos tabata mustra ku Pichingolo Nissan e aña aki tambe tabata riba kamindá pa titulá kampion. E tim a terminá na promé lugá den temporada regular i a klasifiká promé pa ‘playoff’.

Sinembargo Sta Rosa Angels den e kompetensia post temporada a para e fiesta di Pichingolo Nissan. E tim a konta ku asistensia di Leonella Elizabeth ku a dominá e ofensiva dje eterno kampion. Por sierto ku e ta hunga sòfbòl den eksterior i ta picher estelar di selekshon di Hulanda i a keda skohé tambe komo hungadó mas balioso dje final.

E bateadónan di Pichingolo Nissan ayera tampoko a logra bati oportuno aunke ku nan a mishi tòg bon ku e balanan di Leonella Elizabeth. Esaki sinembargo na momentonan krusial tabata dominá e bateadónan i tabata haña bon sosten di su defensa, miéntras ku Angels si a bati hopi oportuno den e seri i tambe wega final.

Por sierto ku Angels ayera fo’i di promé entrada a tuma un ventaha di 3 kareda ora ku Jandely Ricardo a dal un homerun ku 2 koredó riba base. E tim a keda tur momento den ventaha i via di 3-1 a yega di 5 entreda ariba ku skor di 5-3.

Sta Rosa Angels den di 6 i 7 entrada a habri e skor for di otro notando no menos ku 9 kareda: 14-3. Esaki danki na bateo oportuno pero tambe na algun eror kostoso den defensa di Pichingolo Nissan. Finalmente Julisse Koffi a dal un homerun pa yuda su tim ku ultimo karedanan: 6-14.

Picher ganadó a resultá pues Leonella Elizabeth, miéntras ku Arnalda Margarita a pèrdè e enkuentro. Shurvienska Wawoe a sali mihó bateadó pa Sta Rosa Angels ku 3 hit den 3 turno. Pa Pichingolo Nissan e mihó bateadó tabata Emely Jonis ku 3 hit den 4 turno.

Foto’s: Jacinto de Jesus

 

 

Translate »