Sport.cw

Sponsored by

Sponsored by

Sponsored by

Barber a sorprendé Skèrpenè

Centro Barber a gana ganando awe djadumingu, 5 di sèptèmber ku skor di 2 pa 0 di Skèrpènè. Asina aki e tim a tuma revancha p’e derota den promé buelta (3-0). E resultado aki ta nifiká ku Jong Holland ta keda na promé lugá den Liga MCB ku 31 punto, siguí pa Skèrpènè ku 29 punto.

Federashon Futbòl Kòrsou (FFK) a sigui e wikènt tras di lomba ku su kampionato regular den promé divishon, esta Liga MCB. Dje sinku weganan un no a sigui. E federashon a anunsiá ku pa motibunan imprevisto a kanselá e wega entre FC Sithoc i di Subt.

Jong Holland djabièrnè pa di kuater biaha den e kompetensia a empatá, pero di otro banda a gana sobrá weganan. E tim trikolor i Centro Dominguito no a skor kontra di otro: 0-0. E resultado a pone ku Jong Holland a akumulá su di 31 punto for di 13 wega, ku ta produkto di 9 triunfo i 4 tabla.

Skèrpènè tabatin chèns pa okupá e promé puesto riba tabla di posishon sí ela gana awe di Centro Barber. Sinembargo e tim di Barber a presentá den Stadion Dr. Antoine Maduro pa regla kuenta dje derota ku ela sufri den promé buelta. Jeandrick Hugo a pone su ekipo na di 29 minüt dilanti. Na di 51 minüt di wega Darlyson Ellensburg a seya e viktoria finalmente.

Tabata e di dos derota pa Skèrpènè den e kampionato nobo. E tim di fraternan anteriormente a pèrdè kontra di Jong Holland ku skor tambe di 2-0. Esaki tabata riba 4 di yüli. Apesar dje derota Skèrpènè ta sigui okupá e di dos lugá ku 29 punto: 9 wega ganá, 2 empate i 2 derota.

Victory Boys a mantené su posishon number tres riba e tabla di posishon, ora ku djasabra den Stadion Dr. Antoine Maduro ela empatá na 1 gol ku Inter Willemstad. Ruensley Leuteria na di 22 minüt a pone e tim di Vredenberg dilanti 1-0. Jonathan Libiana na di 67 minüt a skor e gol di empate pa Victory Boys.

Victory Boys a gana 7 di su 13 weganan, empatá 4 i pèrdè 2, ku ta bon pa 25 punto i pues di tres lugá. Inter Willemstad ta okupá e di kuater puesto riba tabla di posishon ku 18 punto. E tim di Vredenberg i bisendario te ku awor a gana 5 enkuentro, empatá 3 i pèrdè 5 wega.

Finalmente Undeba i SV Vesta tambe a empatá na un gol ku otro. Na di 31 minüt di wega Virgil Isenia a habri e skor na fabor di Vesta. Tabata Deannejive Willems k una di 47 minüt a skor e gol di empate pa e tim di Bándabou.

Translate »