Sport.cw

Sponsored by

Sponsored by

Sponsored by

Kim Agard ku hit di oro

Souax Gill’s Sport ta sigui gana den e kampionato lokal femenino di softball fast pitch. Danki na un hit di oro di Kimberley Agard e tim a gana ku skor pèrtá di 5 pa 4 di The Fighting Team. Pichingolo Nissan tambe tabata por la goma ganando dos wega den wikènt tras di lomba.

E kompetensia nobo organisá pa Curaçaose Softball Bond (CSB) a sigui den wikènt ku tres wega den divishon máksimo femenino, esta Liga MCB-CSB. Souax i Pichingolo tabata e timnan ku a sobresalí.

The Fighting Team a kuminsá brabu kontra di Souax Gill’s Sport i asta tabata mustra di ta bai kas ku e viktoria. Esaki komo ku e tim a sali i pika 4 pa nada dilanti.

Souax a kambia su picher habridó mandando e talentoso J’Dah Girigorie montíkulo den relevo. Ela logra wanta e ofensiva di The Fighting Team, miéntras ku su koleganan di tim poko poko a skor i empatá e wega den di 5 inen.

Den di 6 inen Kimberley Agard a presentá den kaha di bateo. Ela dal un hit ku a hinka Dianthe Gibbes aden ku e kareda di viktoria pa Souax, despues ku esaki pues a sali kai atras den komienso dje wega.

Pa Souax Gill’s Sport: 5 kareda 5 hit i 4 eror. Picher ganadó tabata J’Dah Girigorie, miéntras ku Mirlam Rosa tabata mihó batiadó ku 1 hit den 3 turno (3-1). The Fighting Team tabatin 4 kareda 6 hit i 6 eror. Picher Libis Hurtado Payares a sufri e derota i mihó bate tabata Gianinna Petrona ku a bai di 1-1.

Pichingolo Nissan a gana su dos weganan ku e tabatin. E tim kampion di Kòrsou a gana primeramente ku 7 pa 1 di Fenix Softex, pa despues derotá Sta Rosa Angels Vanddis tambe ku skor di 8 pa 0.

Picher Arnalda Margaritha a gana e promé wega, miéntras ku Anais Piar tabata e mihó batiadó ku 1 hit den 2 turno (2-1). Pichingolo: 7 kareda, 4 hit i 2 eror. Fenix: 1 kareda, 3 hit i 3 eror. Picher pèrdèdó tabata Yetsely Helmijr i mihó bate Stephany Elsbeth 3-2.

Den e triunfo di 8 pa 0 riba Sta Rosa Angels tabata picher Melanny Castro-Arias ku a gana. Thaima Maximiliana a sobresalí na bate ku 1 hit den 2 turno (2-1).

Pichingolo Nissan tabatin 8 kareda, 5 hit i 1 eror. Pa Sta Rosa Angels Vanddis: 0 kareda, 4 hit i 3 eror. Picher pèrdèdó tabata Suheydi Faneyt, mihó bate Angelique Antonio 2-1.

Translate »