Raymond Begina a titulá kampion dje tradinshonal torneo di tènis di mesa Master 50+, ku tabatin Bremar Agencies komo patrosinadó. Den un final emoshonante ela gana ku skor di 3-2 di Hensley Wentwoord.
Un total di 20 hungadó a inskribí pa por kompetí den e torneo Bremar Master 50+. Tabatin 4 grupo di 5 hungadó den kua a hunga bueltanan preliminar. E kompetensia a tuma lugá den sala di rekreo Iren Moreno na Muizenberg.
E promé 40 weganan di klasifikashon a konsistí di e asina yama ‘best of 3’ i e kompetensia den e fase aki tabatin algun desenlase interesante. Finalmente e hungadónan ku mas eksperensia i alabes mas versá a pasa pa e semi final: Raymond Begina, Hensley Wentwoord, Jacinto Zimmerman i Peter Wong.
Begina a klasifiká pa final ganando fasilmente di Wong ku skor di 3-0. Den e otro semi final Wentwoord a superá Zimmerman ku skor di 3-1 i asina pasa pa e final kontra di Begina. Esaki ya a bira un tradishon último añanan den e kategoria aki. E wega final aki a bai 5 sèt i tabata un konfrontashon emoshonante.
Despues ku Begina a gana e promé sèt ku 11-5, Wentwoord a empatá e wega na 1-1 ganando e di dos sèt ku 11-8. E di tres sèt a bai atrobe pa Begina ku atrobe 11-5, pero Wentwoord ta bolbe tabla e enkuentro superando su kontrinkante den di kuater sèt ku 13-11 pa hasi e wega 2-2.
Den e di sinku alabes último sèt e enkuentro tabatin un desaroyo interesante i emoshonante. Dado momentu ku e skor 10-10 e tenshon a krese bou dje públiko i tabata parse ku e biaha aki sí Wentwoord ta bai logra sali di porta grandi. Pero Begina a mustra su supermasia i ta skor e ultimo 2 puntonan pa gana 12-10 i asina bolbe bai ku e titulo kampionil: 3-2.
E finalista a risibí nan premionan ku tabata patrosiná pa Bremar Agencies. Esakinan tabata opsekio dje doño dje kompania aki ku ta Ashley Hollander i ku den añanan 1960 pa 1970 i despues tabata un dje bon hungadónan di tènis di mesa di Kòrsou.
