E kampionato di vòlibòl hubenil ku a ranka sali wikènt pasá ku vários wega den kompleho Don Bosco i Sentro Deportivo Kòrsou (SDK), ta sigui e wikènt aki. Seis organisashon ta kompetí den e diferente gruponan di edat.
E komishon ku ta organisá e kompetensia di vòlibòl hubenil ta konsistí dje sigiuente personanan: Amy Dutly, Bernice St. Hilaire-Meulens i Durenne Rosalia.
Meta dje komishon ta pa keda traha riba e desaroyo di vòlibòl i esaki tin ku kuminsá na hóbennan. Via organisashon di sufisiente wega durante di e periodo di un aña, e komishon ta spera di por yuda hisa nivel aún mas di vòlibòl hubenil.
E organisashonnan ku ta kompetí den e kompetensia hubenil di vòlibòl ta Shuatanari, ISC Sharks, Hurricane, Watakeli, Xaverianen i The Blues. Tin wega den e sigiuente kategorianan di edat: U14 femenino, U14 maskulino, U18 femenino, U21 femenino i U21 maskulino.
E komienso dje kompetensia hubenil den e respektivo gruponan a transkuri deportivamente, Tabatin algun bon enkuentro. Riba djasabra 19 di yanüari tin e sigiuente weganan: U21 femenino: Watakeli vs Stakamahakchi ta kuminsá 11:15, U21 maskulino Shuatanari vs Hurricane pa 12:15 i U21 maskulino Stakamahakchi vs Shuatanari pa 13:15 na kompleho Don Bosco.
