Sport.cw

Sponsored by

Sponsored by

Sponsored by

Otro triunfo pa Shuatanari

Shuatanari awor ta okupá su só e di dos lugá riba tabla di posishon den divishon máksimo femenino di Federashon Vòlibòl Kòrsou (Fevoko). Esaki despues ku ela gana Hurricane 3-0 ayera, djarason 16 di yanüari 2019. Den divishon maskulino Xaverianen a superá Stakamahakchi tambe ku skor di 3-0.

E kampionato lokal di vòlibòl dediká na Dito Ravenstein, a kontinuá ayeranochi ku dos enkuentro den sala Errol Rooi di Sentro Deportivo Kòrsou (SDK) na Brievengat.

Shuatanari ku den su último kompromiso a gana di Green Jewels 3-0, ayera a sigui ku su racha di viktoria superando Hurricane tambe ku 3-0. Aunke e skor no ta ilustrá esei, pero e dos timnan a bringa duru kontra di otro.

Prinsipalmente e promé sèt tabata hopi emoshonante. Shuatanari a gana esaki ku parsial di 30-28. Ku e skor 1-0 dilanti e tim a gana tambe e sigiuente dos sètnan: 25-17 i 25-21.

Ku e triunfo Shuatanari awor ta su só na di dos puesto ku 4 viktoria i 2 derota. Hurricane ku a kuminsá e kampionato skèrpi a sufri su di dos derota siguí i a awor tin 4 triunfo i 3 derota.

Den divishon máksimo maskulino Xaverianen i Stakamahakchi tambe a trit e fanatikonan riba un enkuentro elektrisante. Tabata Xaverianen ku a bai kas ku e viktoria: 25-15, 29-27 i 25-21.


Translate »