Souax Gill’sport (1) tabatin un tremendo wikènt den kontinuashon dje kampionato hubenil di sòfbòl. E ekipo a gana tur su kuater weganan pa asina keda invikto den e kompetensia. Den e enkuentronan aki e tim a skor 52 kareda i haña solamente 5 kareda kontra.
Curaçaose Softball Bond (CSB) ta organisá e kampionato hubenil di sòfbòl pa mucha muhé. Esaki ta tuma lugá tur wikènt den Buena Vista Ballpark. Un total di sinku ekipo ta kompetí den e kampionato aki.
Porsierto ku picher Kiara Domacassé a sobresalí pa Souax Gill’sport 1 ora ku den e último enkuentro awe djadumingu 11 di mart 2018, ela dominá Sta Rosa Angels Vanddis (1) pa un triunfo di 4-2. Mihó bateadó tabata Fayandra Martis di Souax ku a bati 1 hit den 1 turno i Sueni Felicia di Sta Rosa ku a tèrminá ku 2 hit den 2 turno. Esakinan tabata úniko 2 hitnan kontra dje picher ganadó Kiara Domacassé.
E resultadonan kompleto dje weganan ku a keda efektuá den wikènt tras di lomba ta: Sta Rosa Angels Vanddis (1) vs Pichingolo Nissan 7-2; Sta Rosa Angels Vanddis (1) vs Sta Rosa Angels Vanddis (2) 14-1; Sta Rosa Angels Vanddis (1) vs Sta Rosa Angels Vanddis (2) 15-1; Souax Gill’sport (1) vs Souax Gill’sport (2) 14-3; Souax Gill’sport (1) vs Souax Gill’sport (2) 21-0; Pichingolo Nissan vs Sta Rosa Angels Vanddis (2) 13-1; Pichingolo Nissan vs Souax Gill’sport (2) 16-3; Souax Gill’sport (1) vs Sta Rosa Angels Vanddis (2) 13-0 i finalmente Souax Gill’sport (1) vs Sta Rosa Angels Vanddis (1) 4-2.
Souax Gill’sport (1) ta sólido na kabes dje kampionato hubenil ku 11 wega ganá sin derota. Pichingolo Nissan ta okupá e di dos puesto riba e tabla di posishon ku 9 triunfo i 4 wega pèrdí. Na e di tres puesto ta Sta Rosa Angels Vanddis (1) ku 8 viktoria i 3 derota. Sta Rosa Angels Vanddis (2) ta okupá di 4 lugá ku 3 wega ganá i 11 pèrdí, miéntras ku Souax Gill’sport ta último ku 12 derota sin viktoria te ainda.
Fotonan: Jacinto de Jesus.